ARTIKEL

Julut ati deka nyadi pengeluar chabi pemadu besai di Sarawak

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KOTA SAMARAHAN: Bepun enggau semina ngena 10 kambut poli dikena belajar chara nanam chabi fertigasyen enggau asil pengeransang dua melaki bini ari Kampung Tanah Putih, Endap ditu udah mujur nanam 4,000 pun chabi fertigasyen.

Pekebun chabi fertigasyen tu iya nya Nur Effareena Didi, 28 madahka diatu iya udah berengkah ngepunka dagang nya pengudah ngulu kus sistem nanam chabi fertigasyen.

“Sepengudah nemu chara nyaga chabi fertigasyen kami pan berengkah nanam 10 kambut (poli) chabi. Endang disadang, asil chukup manah ngujungka kami duai laki aku (Syarul Hafez Abdul Azim) ransing agi ngemujurka projek tu ba tanah urung seikar pemesai.

“Laki aku maya nya mega mutus ati badu kereja sepengudah 15 taun gawa ba sebengkah serikat minyak enggau gis ba Bintulu. Kami duai ngaga pemutus neruska dagang chabi enggau nambahka pun chabi 2,000 kambut tauka ulih ngemansutka 4,000 pun chabi,” ku iya maya dirandau Suara Sarawak, apin lama ke udah.

Nangkan ke nya, ku Effareena mega siku nembiak lepas Diploma Pengatur Dagang ari Universiti Teknologi Swinburne nerangka iya tepaut ati bekebun chabi fertigasyen kenyau ari taun 2017.

NUR EFFAREENA DIDI

“Terubah suba, laki aku bisi ati deka bejaka pengawa nupi manuk penakan pengudah ngulu sebengkah kus betanam betupi ba Bangi, Selangor (20170 tang ungkus ti dikena ngepunka projek nya chukup besai iya nya manggai RM60, 000 ungkup nupi 3,000 iku anak manuk.

“Enda memukai udah nya, laki aku tepedaka siti iklan ba laman Facebook pasal kus nanam chabi fertigasyen lalu kami duai mutus ati nguji ngulu kus ke diatur HFE Agro Resources Sdn Bhd.

“Bekau ari ngulu kus nya, Kami duai terus meli kereban ke dikena nanam chabi fertigasyen,” ku iya.

Ku iya, chukup manah jaku peransang pengelicha ke meri kus, tambah mega puku dikena ngepunka dagang tu mega ulih tangkup iya nya semina RM20, 000 dikena meli perengka guna ke patut nyengkaum 2,000 kambut poli.

“Puji Tuhan ba taun 2019, kami bulih geran ari Opis Betanam Betupi Sarawak nyengkaum Rumah Gadung (40 kaki x 60 kaki) enggau 400 kambut poli set fertigasyen.

“Udah nya, ba taun 2019 sekali agi kami duai bulih bantu ari Kaunsil Pemansang Kandang Menua Begulai (IADA) iya nya Rumah Gadung (20 kaki x 100 kaki) enggau 300 kambut poli set fertigasyen.

“Ditangkan taun 2020 enggau tahun tu, kami duai bisi ngulu Program Pemansang Agri-Kunterikor enggau Industri (Acid) ba baruh Opis Menteri Pemansang Pengawa Dagang enggau Gerempung Kerejasama sereta nerima dua iti Rumah Gadung (60 kaki x 100 kaki) enggau 2,000 kambut poli set fertigasi,” ku iya.

Kebun Chabi Fertigasyen ke diempu Effareena ba Kampung Tanah Putih Endap, Kota Samarahan.

PEMAR DITAPI

Nusi pasal pemar nanam chabi fertigasyen tu, iya madahka pengawa tu mesti diadu manah enggau bisi penemu pasal chara ngintu chabi.

“Kami mega kala puntan nanam chabi ketegal kena penyakit kulat enggau kena kachau indu utai.

“Nya alai, ni maya ke patut nanam chabi patut dilanggur manah kelimpah beratika rega makit chabi ba pasar,’” ku iya.

Effareena mega bekunsi juluk nyapai asil chabi ke ditanam iya nya urung 2 ngagai 3 kilogram (kg) ungkup sekambut poli (siti pun chabi) semusim enggau iya mega meda bansa utai tanam.

“(Musin keterubah) kami semina bulih baruh ari sekilogram ari siti kambut poli, (musin kedua) kami bulih asil 2 kg enggau puji Tuhan (musin ketiga) kami mujur ngasilka 3 kg ari sekambut pun chabi.

“Ba (musim ketiga) tu, kami nyaga bebendar kualiti cabe, pemerat enggau focus cabe tu ulih datai target ke udah diatur,” ku iya nerang.

Chabi fertigasyen ke ditanam Effareena ba Kampung Tanah Putih Endap, Kota Samarahan.

Nangkan ke nya, perambu udah tu ku iya deka ngurangka ungkus operasyen, nambahka produktiviti enggau kualiti, bekelimatka belanja, ai sereta sum.

Naka tu, ku Effareena sida semina nyual chabi ba pasar enggau nganjung ngagai pedagang ke ngangkat mayuh.

“Aku ngarapka kami ulih nyadi pengeluar chabi ba bagi menua Kota Samarahan, Kuching enggau Serian sereta nyadi pengeluar besai ba semua Sarawak.

“Aku mega ngarapka pemerintah neritka isu import chabi enggau meri peluang ngagai pekebun chabi ari dalam menua empu ngeluarka chabi,” ku iya.

Diatu, Effareena enggau laki terus chakah bedahang ngena pelasar digital baka Whatsapp, Facebook enggau mayuh agi dikena ngelakuka produk digaga ari chabi.

Kelimpah ari nya, mensia mayuh ke bisi ati deka meli chabi ari Effareena ulih meda ba Facebook Hafa Agriculture tauka Facebook iya empu Erina Reesha enggau Hafez Azim.

Chabi fertigasyen ke ditanam Effareena ba Kampung Tanah Putih Endap, Kota Samarahan.

BERITA LAIN

BERITA TERBARU