Kaban MPKKP di Sarawak deka dilatih dulu

KUCHING: Kaban Komiti Pengatur Genturung Pendiau Perintah Besai (MPKKP) di Sarawak ke udah dipilih deka dilatih dulu, ku Chairman Pakatan Harapan (PH) Sarawak, Baru Bian.

Ku iya, jam ngelancharka MPKKP bedau ditetapka agi, tang iya maya ti engkeman endur ngelancharka MPKKP, pengudah sida ti dipilih renggat keterubah tembu dilatih bepun bulan Januari taun baru.

Tandu Baru, sida ti dipilih nyereta latih tu endang sida ti dipilih ari ketuai raban bansa nengeri tang ukai ari Gempung Parti Sarawak (GPS).

Pia mega, Sarawak disadang ulih numbuhka urung 5,000 buah Komiti Pengatur Genturung Pendiau Perintah Besai (MPKKP).

Menteri Kereja Raya nya mega madahka ketegal nya sida begunaka awak endur numbuhka MPKKP laban bepanggai ba rumah panjai enggau kampung ti bisi di menua tu.

“Diatu MPKKP benung bejalai lalu aku dipadahka urung 2,200 peminta ari Sarawak deka bepun dipejalai taun baru.

“Lebuh sida ti dipilih udah dikemendarka Opis Menteri Pemansang Menua Pesisir (KPLB), sida deka dilatih sebedau bepun meri servis,” ku iya.

Baru bejaku munyi nya lebuh ditanya pemberita ba sebuah restauran ditu, kemari.

Ku iya, sida andalka bala ti dichiri tu deka nyadi orang ti meri penemu (penerang) entara Perintah Besai enggau komuniti ba selampur Sarawak enggau Malaysia.

“Nama bagi isu ti ditapi rayat dalam komuniti tau dipadah ngambika datai ngagai Perintah Besai.

“Bisi beberapa agih belanja deka disedia ungkup sida lalu sida deka ningka lalau ari KPLB sentang agih belanja tu sebedau ngaga peminta.

“Taja pia, agih belanja tu deka dikuasa KPLB laban bepanggai ba pemadu guna belanja sebuah kampung tauka peminta,” ku iya.