Kaban Pedas Sarikei tusah dibantu

SARIKEI: Serakup Dayak Sarawak (Pedas) Sarikei semampai betatika nasip bala kaban sida ke udah diambu baka diri menyadi.

Ku Ketuai Pemadah, Aldrich Cliffranc, sida sinuka pemedis diasaika siku ari kaban serakup nya ti udah dipasuk berubat ba Sepital Sarikei ditu kenyau Hari Satu tu tadi.

“Kami sebuat lalu ngatur randau sereta selubang penemu meri bantu mata duit ngagai Jhancasila Juntan ke ditepan sakit puan.

“Iya tu siku kaban enggau madi ti chukup mentas sereta kemerah enggau begulai, nadai kala belampung tulang lebuh ngereja pengawa,” ku Aldrich.

Bantu mata duit penyampau RM100 ari serakup udah disua sida sebuat ti ngatur pejalai ngabas seraya meri peransang ngagai Jhancasila ba wad Sepital Serikei ditu, tengahari kemari.

Ku Aldrich, penatai sida sebuat disambut Jhancasila enggau ai mata laban ngenang penyiru kaul sida ti deka kiruh ngesah penusah nuntung iya.

“Barang sapa ke tusah sigi patut dibantu taja bantu nya nadai nyenggala tang tu mih kelai kami beratka kaul enggau pangan diri.

“Bantu tu mega dikena kami nyaup ngelempungka mimit tating belanja tudah ke benung berubat,” ku Aldrich nerang.

Berindik ari nya, Aldrich sereta bala madi Pedas bukai ngarapka Jhancasila deka liat ati napi penguji besai tu sereta besampika iya jampat pulai gerai baka selama.

Suara Sarawak