Kaban PKR Sarawak nyukung Anwar

KUCHING: Semua kaban Parti Keadilan Rayat (PKR) Sarawak nyukung Datuk Seri Anwar Ibrahim nyadi presiden parti nya.

Penerang nyain jaku sukung nya diuluka Chairman Kaunsil ketuai Nengeri (MPN) Sarawak ti mega nyadi Ketuai PKR Pampang Lawas Baru Bian.

Ku Baru, presiden enggau sapit presiden meseti sepenemu dalam parti laban semina seduai aja ulih mai penyerakup ngagai parti nya.

“Kami nyukung Presiden enggau Sapit Presiden laban seduai endang udah dipilih kaban parti tu empu.

“Tu mih maya kitai ngentapka penuduk parti kitai lalu fokus ngagai misi kitai iya nya menang ba pengawa bepilih nengeri dalam kandang dua taun ti deka datai,” ku iya madah ba siti penerang.

BARU BIAN

Nangkan nya ku iya ti ngarika PKR, sida enda nerima sekali sebarang pengawa politik ti kamah.

“Orang ti ngena taktik ti chukup sinu baka tu nadai ngembuan penemu ti mereti sereta nadai integriti.

“Nya alai aku ngelalau tiap iku ketuai sereta raban parti sama mansang lalu fokus ngagai isu ti lebih begunaka perati kitai,” ku iya.

Berebak enggau nya mega, Baru madah tiap iku raban parti nya patut sama ngelalau nembiak rebak baru rinduka pengawa ngatur menua kelebih agi pengudah perintah nurunka tikas umur ngundi ngagai 18 taun.

Raban politik patut nyadi malin sereta chunto ti manah ngagai nembiak rebak baru diatu, ku iya.

Entara penyukung ari penerang dipansutka Baru nya Mandal Presiden Nasional ti mega nyadi Ketuai PKR pampang Saratok Ali Biju, Sapit Chairman MPN ti mega nyadi Ketuai Pampang Petrajaya Baharuddin Mokhsen, Mandal Chairman MPN I ti mega nyadi Ketuai PKR pampang Puncak Borneo Willie Mongin, Mandal Chairman II ti mega nyadi Ketuai PKR pampang Lubok Antu Nicholas Bawin sereta ketuai enggau kaban MPN PKR ke bukai.

Suara Sarawak