KUCHING: Pengawa numbuhka kabinet Sarawak ke baru ungkuo bejalaika pengawa ngatur nengeri tu endang prerogatif Kepala Menteri (KM).
Sapit Sekretari Besai Parti Pesaka Bumiputera Bersatu (PBB) Satok, Datuk Ibrahim Baki nyemetak madah pengawa nyiri raban kabinet Menteri ke baru deka ditentuka Datuk Patinggi Tan Sri Abang Johari Tun Openg ke nyadi Chairman Gempung Parti Sarawak (GPS).
“Aku nadai sebarang komen pasal pekara nya, lalu nya dilempai ngagai Kepala Menteri nentuka rintai kabinet iya,” ku iya nyaut tanya pemberita pengudah program Christmas Meet and Greet ba premis di Jalan Rubber Road, kemari.
Adun Satok nya mega madah, iya andal pengawa numbuhka kabinet deka digaga enggau manah.
Sebedau tu, GPS ngerikodka pemujur menang besai bulih 76 penuduk ba Pengawa Bepilih Besai Nengeri ke-12 (PRN-12), sereta ngelui 72 kerusi ke diulih Barisan Nasional ba PRN11, 2016.
GPS diarika PBB, Parti Rayat Sarawak (PRS), Parti Sa’ati Rayat Sarawak (SUPP) enggau Parti Demokratik Progresif (PDP).
