KABONG: Begunan opis pelilih ti baru beungkus RM7 Juta deka digaga di Kabong enda lama agi beduduk ari menua ke deka diangkat nyadi pelilih menua.
Kepala Menteri Datuk Patinggi Abang Johari Tun Openg madahka begunan opis baru tu chukup besai reti laban peranak ditu begunaka opis ti manah ari ke sebedau tu sereta lantang alai sida berandau lalu ngenataika penanggul ditapi enggau pemesai ba opis.
“Aku udah diberi penerang ulih sekeda ejensi perintah ti bekaul enggau projek pemansang ti benung digaga di Kabong.
“Ba jam ti perintah nguji deka nyungkak ke agi aktiviti ekonomi nyengkaum aktiviti betanam betupi, servis ngagai rayat enggau dagang temuai di Kabong.
“Pemansang infrastruktur ditu mega mesti ditambah sereta dikemanahka agi jemah berindik ari status menua tu ila deka diangkat nyadi pelilih menua.
“Pekara keterubah kitai mesti ngaga baru opis pelilih ti baru nganti iyaka lama ngambi ulih meri servis manah agi ngagai rayat ditu ari iyaka udah,” ku iya.
Kepala Menteri Datuk Patinggi Abang Johari Tun Openg bejaku munyi nya ba penerang iya ngagai pemberita pengudah tembu pengawa pejalai ngabas Taba Loji Bekal Ai Beresi Fasa 1 di Kabong lemai tadi.
Nambah nya, ku iya, Opis baru beungkus RM7 Juta tu ila deka diseretaka enggau kereban kena gawa ti manah agi ari diatu ngambi ulih meri servis ti lebih manah ngagai peranak enggau mensia mayuh besemak ditu.
“Penembu opis tu ila mega deka ngemudahka pengawa peranak lebuh begunaka servis ari sida ti gawa mega ulih lantang agi berandau betimpai mua enggau pemesai perintah dibanding enggau sebedau tu.
“Enggau nya, perintah pan ulih meri servis ti pemadu manah ungkup pemaik enggau pengelantang rayat ditu jemah,” ku iya.
Sama bisi datai iya nya,Menteri Muda Bekal Ai, Dr Abdul Rahman Junaidi, Sekretari Perintah Sarawak Datuk Amar Jaul Samion, Adun Kabong, Mohd Chee Kadir enggau ke bukai.
