Kain burie dijait Rowena ngembuan ukir eksklusif

KUCHING: Pengalus kain burie digaga Rowena Grinsam udah narit ati siku peranak di Australia.

Lebuh dirandau, Rowena Grinsam madah, penguna nya benama Belle lalu iya meli bulan Februari 2020.

Ku Rowena, kain burie dijait iya ngembuan ukir eksklusif kediri empu baka ukir Kumang Paku enggau kumang Engkudu.

Rowena ke mega penakan Iban China madahka dua ukir burie nya nerima mayuh peminta.

“Nyadi, dua bansa ukir nya kira keranjai jari, penyelai produk enggau buah runding aku empu ke nerima mayuh peminta nyentuk diatu.

MANAH DIPEDA… Kain burie diasilka Rowena.

“Aku teulihka runding ngepunka dagang burie tu lebuh terubah diasuh bakih aku nyaup iya nyait kain ke bisi kerubung tekuyung.

“Lebuh ke nyaup iya bejait, kami duai berandau lalu iya nerang ngagai aku pasal pengawa nyait kain burie tu.

“Bendar tudah bakih aku benama Catherine Charlie ari Batang Rajang nya ngajar chara nyait kain burie enggau baka ni nandaka ukir ke deka digaga.

“Selabuh udah diajar iya, aku meransang ati diri nguji kediri ngaga kain burie tu, ni nemu ulih nyadika produk pengelandik jari ku tudah aku bejaku dalam ati.

“Puh amat tudah ngajar aku laban sigi baka kitai baru belajar, bisi aja utai ke salah, nya kebuah lebuh belajarka pengelandik jari, mesti liat ati, sabar ngambi produk nya manding dipeda sereta ulih narit ati mensia mayuh.

“Nyau ke lama, kira landik agi ga tudah diri ngaga kain burie tu ngujungka aku berengkah nyual sereta mantaika keranjai jari sebelah media rama.

“Ari nya tadi, mayuh orang ‘labuh pengerindu’ meda pemanah keranjai jari aku sereta sida madahka diri deka ngudar,” ku Rowena ngepunka randau enggau Suara Sarawak.

BEDUA PENEMU

PEDAGANG KRAF… Rowena bekenaka produk burie digaga iya empu.

Nampung baru, Rowena madahka iya berengkah belajar ngaga kain burie tu ba taun 2018 lalu iya kala masuk kelas diatur Louis Wesly enggau Kamsiah Anal.

Ari nya, iya suah nitihka Louis Wesly bejalai ngajar bejait kain burie ngagai raban indu ke diau ba rumah panjai.

Nambahka nya, iya mega kala nyempulang Clement Wong enggau Catherine Charlie ngaga Johor ngatur Bengkel Kain Burie.

Rowena mega madahka diri kala bekerejasama enggau ibu iya, Sentia Ningkan ngajar ngaga kain burie ngagai bala bukai ke alai bengkel nya diatur Datuk Mayang Doreen di Betong.

“Pemuas ke nyempulang sereta sama ngajar ngaga kain burie tu, mayuh agi ga penemu baru pasal pengelandik jari tu.

“Lebuh ngajar ba bengkel nya, kami ukai semina ngajar tang keran deka nyungkak penatai pemisi raban indu kelebih agi ke diau di rumah panjai.

“Lebuh ke begulai sama ngajar enggau pengajar bukai, dia kami bela bekunsika penemu ngagai bala anembiak laban sayau bendar nyema penemu nya enda dikunsi ngagai bala bukai.

PEMILIH… Bemacham produk digaga Rowena digaga ari kerubung tekuyung.

“Munyi ku jaku sempama, buah ubi laun dikali, buruk di pun, buah empasa laun diempa lunggar taun.

“Baka ke ditemu kitai, indu rumah panjai endang landik ba tunjuk jari tang kami dekaka pengelandik dikembuan sida nya bisi penguntung iya.

“Lebuh ke ngajar tadi, kami mega bekunsika penemu sentang baka ni chara sida ulih ngelakuka produk sida.

“Baka tudah aku, ari nyaup bakih nyait kain burie, diatu nya aku empu ga bedagangka kain burie asil keranjai jari diri empu.

“Munyi ku jaku tuai, jauh agi pejalai mayuh agi utai diasai lalu jauh agi ga kerembai penemu.

“Tuju ati kami ngatur bengkel baka tu laban dekaka raban indu makin maju nitihka singkang arus pemansang kelebih agi ba dunya moden.

NARIT ATI… Siku model bekenaka produk skirt enggau selampai burie konsep kontemporari digaga Rowena.

“Kelimpah nyempulang bala bukai ngajar bengkel, aku mega suah ngelakuka produk kain burie tu ba palan besai bebelika barang di menua tu.

“Orang ke balat meransang aku ba dunya kraf tu iya nya Datuk Amar Douglas Uggah Embas enggau Datuk Mayang Doreen.

“Sama mega enggau sida ke ‘anda’ ba pengawa ngaga kain burie baka Clement Wong enggau ibu aku, Sentia Ningkan.

“Sukung ari indai enggau kami sebilik di Saratok mega besai reti ba aku laban jaku peransang ke suah dikenataika sida udah meransang aku meruan beretan sereta ngemansangka dagang produk kraf tu.

“Suah bendar sida ngajar aku semampai liat ati enggau sabar nempuh penguji ba dunya dagang lalu anang mantul ngapa, munyi ku jaku sempama tuai, anang mantul ngapa seagi enda tepantup ba bandir.

“Besai bendar reti jaku sempama nya ngambi kitai ulih angkat baka pedagang bukai lalu ngining produk diri rembus ngagai makit menua tu enggau entarabansa.

“Bala bakih mega semampai nyukung aku enggau ngenataika jaku peransang ngambi aku kering ati ngemansangka dagang tu,” ku Rowena temegah ati laban nerima mayuh sukung.

MAKIT ENTARABANSA

KENANG BEGULAI… Rowena begambar ungkup kenang enggau bala bukai rambau pengawa nyuaka perais ba sebengkah program diatur Clemend Wong enggau Catherine Charlie.

Rowena ke asal ari Betong tang ngentapka diri ba Kuching madah, iya terus nerima pesan ari siku penguna madahka diri tekait ati meda pemanah enggau pengalus ukir kain burie nya lebuh terubah iya mantaika produk pengelandik jari ba ruai Facebook.

Ku Rowena, bala bakih ke meda produk iya mega madahka diri rindu meda pemanah ukir kain burie nya.

“Lebuh mantaika produk nya sebelah media rama, nyau makin mayuh orang tekait ati sereta ngudar ba aku dataika naka diatu, produk aku udah rembus ngagai makit entarabansa.

“Puji Tuhan, dagang aku diatu nyau makin maju lalu kain burie aku udah dikelala datai ba menua Australia, Dubai, Indonesia enggau Brunei kelimpah ba selampur Sarawak enggau di Semenanjung Malaysia baka di Kuala Lumpur enggau Johor.

“Nyau ransing agi ga ngaga kain burie tu nunda ukir diri empu laban enda disadang kain burie tu udah ‘terebai’ ngagai menua ribai,” ku iya mantaika pengaga ati diri.

Naka diatu, iya madahka diri mantaika produk kain burie nya ba ruai Facebook enggau Whatsapp Group.

Nangkan nya, suah mega iya ngatur bengkel ngajar burie begulai enggau pedagang kraf bukai sereta suah mega ngatur kelas burie kediri empu.

Lebuh ditanya pasal pengelebih produk, Rowena madahka kain burie digaga iya ngembuan ukir kediri empu.

“Tebal agi bala penguna ke kala meli kain burie ari iya endang madahka diri rindu meda kerubung tekuyung ba kain nya berurun sereta ukir iya mega nyelai.

ENDA RANGKA PENEMU… Rowena entara siku pengajar ke ngatur bengkel ngaga burie ngagai raban indu ba rumah panjai di Betong.

“Baka aku, pengelebih produk tu laban bisi chap dagang kediri empu lalu nadai nunda ukir orang bukai.

“Reti iya, kitai aja bisi ukir nya, ambika banding, baka kain burie digaga aku bisi penama iya empu iya nya kumang paku enggau kumang engkudu bepelasarka ukir enggau belit kerubung tekuyung nya,” terang iya.

Naka diatu, Rowena ngelakuka produk kain burie ba laman Facebook iya, Rowena Grinsam.

Iya mega madah, bala bakih bisi nyadi agent nentuka produk iya makin laku baka udah rembus ngagai makit entarabansa.

Berebak enggau nya, iya madahka selambar kain nya ulih tembu ba timpuh dua minggu.

Ku iya, semua kereban dikena ngaga kain burie nya dibeli ari kedai krafjari, kedai kain enggau kedai manik.

Taja pia, maya pandemik tu iya suah ngudar ba pemekal menua enggau meli ari menua China nengah online.

DAGANG DIGITAL

BESAI JASA… Rowena begambar enggau ibu iya, Sentia Ningkan rambau pengerami makai lemai Kelab Saribas.

Enti deka nyebut pasal untung sebulan, Rowena madahka kitai mesti ngembuan minat enggau disiplin ba pengelandik jari tu.

“Nya entara ulah ke patut dikembuan kitai, udah nya tadi keranjai jari kitai mesti berurun enggau bungai tauka ukir kerubung tekuyung nya manah dipeda mata.

“Enti kain burie digaga kitai nangkup semua pekara nya, bala penguna sigi nadai kakang ati mayar nitihka rega diletak kitai.

“Nya kebuah, semua pekara nya beguna amat nentuka bala penguna tepantup ati,” terang iya baru.

Berindik ari nya, Rowena madahka kain burie dijual iya berega entara RM150 ngagai RM1,000 bepanggai ba pemesai enggau bansa kerubung tekuyung ke dikena.

Kelimpah ari kain burie, iya mega bisi nyual dress, skirt, tali pinggang, selampai, baju lelaki, vest, jacket, ketapu, kantung sandik, sumpin enggau bingkai gambar.

Terang iya, entara pemar ba dunya dagang kraf tu iya nya mayuh kedai ditutup kelebih agi sekumbang Atur Mindah Betagang (PKP) ketegal pandemik Covid-19.

Kebuah pia ku iya, enti ngudar barang diguna nengah online, kekadang kereban ke datai nya enda sebaka kualiti kedeka kitai lalu kitai nyau nganti lama endur barang nya datai.

JULUK ATI

DIKERINDU… Rowena enggau dua iku indu bela bekenaka dress, skirt enggau selampai ditambah enggau kerubung tekuyung.

Rowena madahka dagang digital diatu ngembuan mayuh pemanah kelebih agi maya pandemik Covid-19 tu.

Taja enda ulih mindah ke bukai, tang Rowena madahka diri meruan nerima udar baka selama laban dijual nengah pelasar online.

Tambah mega ku iya, enggau pemisi teknologi digital tu, jampat agi nerima udar laban bisi group khas endur kami bedagang sereta mantaika produk diri.

Enti ba Facebook Pages, kitai ulih bedagang jauh agi enggau ulih ngelakuka produk nya ngagai tikas entarabansa.

NYELAI… Penyelai produk kain burie ukir kumang paku digaga Rowena udah narit ati mensia mayuh.

Iya pechayaka, semua kitai bisi akaun Facebook nadai ngira biak tauka tuai lalu ari nya, produk kitai ulih dikelala ba serata dunya.

“Sigi ke tuju ati aku, arapka pengelandik asal kitai Iban tu ulih ditampung ngagai rebak dudi ngambi enda lesap diserunyut arus pemansang dunya.

“Sayau amat nyema pengelandik tu enda ditampung laban kitai dekaka produk asal diangkat ngagai tikas ke tinggi agi.

“Pengelandik jari tu mega ulih nyaup nambahka penatai pemisi diri sebilik kelebih agi ba dunya moden diatu.

“Diatu, mayuh pedagang kraf udah maju sereta rembus ngagai makit entarabansa lalu pekara tu tau bendar ngubah pengidup kitai menyana agi sebaka enggau orang bukai.

“Nya alai, pesan aku nuju rebak baru, anang enggai nampung pengelandik asal kitai Iban tu lalu kitai mesti angkunka pengawa baka tu.

“Enti enda nemu, kita tau belajar laban diatu chukup mayuh endur kitai belajar baka ba sebelah media rama baka Facebook enggau Youtube tauka masuk bengkel ke bisi diatur ba menua tu,” ku iya nyimpul randau.

Suara Sarawak