BINTULU: Bisi 20 iku indu ari sitak Kakus udah ngulu Program Kraf Kreatif Dun Kakus – Kelas Kain Burie diatur ba Balai Lumba Tatau ditu, apin lama ke udah.

Program nya diatur nyerumba pengawa nyuaka Bantu Kereban Betanam Betupi (AFF) Projek Nanam Buah Rian ngagai 239 iku peranak ari kandang menua Sungai Arip, Sungai Tau, Sungai Bawang, Sungai Anak enggau Selangau.

Program tu diatur bini Menteri Muda ba Opis Kepala Menteri (Undang- Undang enggau Adat Bumiputera) ti mega Adun Kakus, Datin Melia Gelen.

Lebuh bejaku, Melia ngarapka bala penyereta deka ngerembaika pengelandik ti udah dipelajar sida.

Pia mega ku iya, program tu mega ulih meransang sida ngaga kain burie, ukai semina ungkup diri empu aja tang ulih dikelaku ngagai makit menua luar.

Iya bisi amat pengandal kandang menua Kakus deka tampak rita nyadi pemansut kain burie.

“Kandang menua Kakus deka tebilang enti sema kita keran ngerembaika asil kain burie tu.

“Tampung pengawa kitau lalu enti udah landik ila, asil burie digaga kita deka dikelala bala bukai enggau bisi chap dagang kediri empu,” ku iya.