Kalender aktiviti dagang temuai 2021 dilanchar

KUCHING: Opis Menteri Dagang Temuai, Seni enggau Main Asal udah ngelancharka kalender aktiviti dagang temuai ba taun 2021.
Menteri Muda Dagang Temuai, Seni enggau Main Asal, Datuk Sebastian Ting madahka bisi 117 bengkah aktiviti dagang temuai deka diatur ba taun baru.

Ku Sebastian, Opis Menteri Dagang Temuai, Seni enggau Main Asal begulai enggau bakih strategik bebendar nusun rintai aktiviti nya.

Terang iya, opis menteri nya deka fokus ngagai aktiviti bepelasarka eko-dagang temuai enggau dagang temuai komuniti ti nagit aktiviti dagang dalam menua.

“kami meransang peranak menua kelebih agi ba menua ulih nyendiaka servis homestay.

“Aktiviti tu setipak enggau juluk opis menteri deka ngangkatka dagang temuai menua,” ku iya.

Sebastian mansutka jaku nya ba aum pemberita pengudah betuaika aum ketiga Komiti Dagang Temuai Sarawak ba Palan Aum Borneo Kuching (BCCK), ditu tadi.

Sama datai Sekretari Mendam Opis Menteri Dagang Temuai, Seni enggau Main Asal, Hii Chang Kee, Ketuai Pemesai Eksekutif Kaunsil Dagang Temuai Sarawak (STB), Sharzede Datu Salleh Askor, Direktor Opis Menteri Dagang Temuai, Seni enggau Main Asal (Motac) Charles Suriya Buas enggau Ketuai Pemesai Eksekutif Kaunsil Seni Sarawak, Shatkawi Amit.