Kami asa ketuai kanan PKR dibuai ari parti

SIBU: Semua kaban komiti Parti Keadilan Rakyat (PKR) Pampang Kanowit udah seati ningkilka diri ari parti nya, ditu ensanus.

Pekara bekaul kaban komiti ti ningkilka diri tu dipadah Ketuai Pampang iya, George Chen nengah sebengkah penerang, ditu ensanus.

Taja pia, ba penerang nya iya enda madahka berapa iku kaban komiti ti ngemaduka diri mangku pengawa sida nya.

“Lebuh beratika utai ke nyadi diatu, kami seati besetujuka kaban komiti Pampang Kanowit ti dipilih bagi sesi 2018-2021 deka ngelepaska semua pangku pengawa kami dalam parti tu.

“Kami meri terima kasih ngagai ketuai parti sebedau tu laban meri kami awak gawaka raban bansa enggau rayat,” tandu iya.

Chen madah, sida ningkilka diri ketegal penyarut ti nyadi dalam parti nya.

“Dalam kandang 20 taun ke udah, kami udah ngasaika mayuh kenang manis enggau pait lebuh negika parti tu.

“Kenang pemadu manis kala diasaika kami iya nya menang dalam Pengawa Bepilih Besai ke-14 (PRU14) ke alai PKR udah nyadi politik pemadu besai parti entara parti komponen Pakatan Harapan (PH).

“Tang, kenang manis nya enda lama laban penyarut dalam parti pengudah milih parti kena bulan November 2018 tu tadi.

“Parti tu pambar dua piak kelimpah udah ngujungka PH alah ba ujung bulan Februari tu tadi.

“Kami berasai sinu laban kami udah negika parti tu lebih ari dua puluh taun lebuh kami gawa bebendar, bejalaika bemacham inisiatif enggau ngiga belanja ngambi ngemansangka parti baka ke bisi diatu,” ku iya nyemetak madah.

Ku Chen, pengawa ngemaduka sekeda ketuai kanan parti ba Sarawak ti dipejalai Kaunsil Supreme Nengeri (MPN) ti baruh enggau Supreme Kaunsil mega udah ngujungka sida ngaga pemutus baka nya.

“Kami asa enggau ulah sida ngemaduka sekeda ketuai kanan parti kami apin lama ke udah.

“Nya alai, kami nadai pengandal ngagai ketuai supreme parti ti udah ngaga pemutus ke enda patut kelimpah munaska utai dikearap kami ngelama tu,” ku iya nerang.