SARATOK: Peranak menua pesisir lebih agi ba Saratok ditu endang agi randaka pemansang sereta andalka chalun Gempung Parti Sarawak (GPS) ditu ulih menang besai ba Pengawa Bepilih Nengeri Ke-12 (PRN-12).
Tuai Rumah (TR) Uding anak Enggong,48 taun ari Ulu Budu madahka GPS endang patut disukung berindik ari sitak tu (Krian) ti jauh udah tinggal ari sukut pemansang lalu nadai diungkupka agih belanja dikena ngemansangka menua sepengelama 10 taun ke udah ari perintah Sarawak ketegal nadai ngembuan pengari rayat ari GPS.
“GPS endang patut disukung lalu patut diundi kena 18 Disember ila.
“Kebuah pia, laban kitai udah jauh tinggal sereta udah puas dilaung ari nerima agih belanja ungkup dikena ngatur pemansang tauka projek ari perintah Sarawak ngelama tu laban kitai (Krian) diarika pengari rayat bukai.
“Tu mih peluang pemadu manah lalu enda patut dibasau kitai enggau pia aja, awakka Krian sama mansang baka Kalaka enggau Kabong ba sukut pemansang infrastruktur enggau ke bukai,” ku iya.
Iya madah munyi nya ba pejalai chalun GPS Krian, Friday Belik niki rumah panjai sida, apin lama ke udah.
Nangkan ke nya, ku iya nyema Friday mujur rayat Krian deka bisi dua iku pengari dalam perintah iya nya siku ba perintah nengeri lalu Datuk Ali Biju (MP Saratok) nyadi pengari rayat ba renggat perintah besai.
