SERIAN: Gempung Parti Sarawak (GPS) deka nganjung chalun bediri ba penuduk Opar maya Pengawa Bepilih Nengeri Ke-12 (PRN12), pia ku Kepala Menteri Datuk Patinggi Abang Johari Tun Openg.
Ku iya, suba pengempu penuduk Opar, Datuk Ranum Mina menang Dun nya ngena tikit Barisan Nasional (BN) nyadi chalun lebuh PRN-11.
“Nya alai, kami deka bediri ngambi baru penuduk nya (ungkup GPS).
“Chalun ti deka bediri ba Dun Opar deka dipadah ila,” ku Abang Johari.
Abang Johari mansutka jaku nya ba aum pemberita pengudah Pengerami Ketuai Begulai enggau Rayat ba Dewan SJK Chung Hua, ditu ensanus.
Ari lapan penuduk Bidayuh, semina Opar aja bedau diempu GPS pengudah Ranum tegap penemu nyemilik PSB nyentuk diatu.
Nambahka nya, Abang Johari andalka lapan penuduk Bidayuh nya mengkang diempu GPS enti sema raban bansa nya seati.
Dulu ari nya, Abang Johari ti mega Chairman GPS madah, Perintah Sarawak (Malaysia) deka ngaul kerejasama enggau Perintah Indonesia di baruh SOSEK MALINDO.
“Perengkaguna ba adan Sarawak (Malaysia) enggau Kalimantan Barat (Indonesia) deka dikemanah laban kitai merambu nirika opis dagang ba Pontianak.
“Perambu tu deka ngemuntangka Sarawak ngelakuka produk pemakai ngagai menua sepiak nya,” terang iya silik agi.
Iya mega madahka Perintah Sarawak udah ngagihka belanja lebih RM400 juta ungkup rayat ba kandang menua Serian.
