KUCHING: Gempung Parti Sarawak (GPS) nadai ulih nerima pengelawa politik DAP enggau ulah sida ngagai rayat Sarawak.
Presiden Parti Rayat Sarawak (PRS), Tan Sri Dr James Jemut Masing madah, DAP nya bakih ke tusah dipechaya dalam gempung politik Sarawak.
Ku Masing, Sekretari Besai DAP, Lim Guan Eng ba penemuai opis menteri iya taun nyin kemari udah ngemaruhka Sarawak lebuh madahka menua tu deka bankrap ba timpuh tiga taun.
“Nama kebuah? Bajet RM10 bilion setaun deka ngabis belanja simpan RM31 bilion dalam tiga taun.
“Guan Eng melaba kitai nadai belanja agi ba timpuh tiga taun lalu iya nyengala amat nyebut pekara nya.
“Taja pia, Guan Eng nadai berunding Sarawak bisi penatai pemisi ninting taun,” ku Masing.
Masing mansutka jaku nya lebuh Pengerami Makai Taun Ke-16 PRS enggau Makai Selamat ba Palan Aum Borneo Kuching (BCCK), Hari Tiga tu tadi.
Masing madahka GPS nyukung sebarang parti ba Malaysia numbuhka perintah tang sida enda nyukung Parti DAP ketegal ulah Guan Eng enda bebasaka penau ketuai GPS ngulihka belanja.
Sapit Kepala Menteri nya madah, GPS ngembuan 18 iku Kaban Parlimen suah ditapatka sida ke deka nyadi Menteri Besai Malaysia.
Berebak enggau nya ku iya, Tan Sri Muhyiddin Yassin enggau Datuk Seri Anwar Ibrahin begunaka sukung GPS lebuh nya lalu GPS udah milih Muhyiddin.
“Kami ngaga pemutus bepelasarka dua pekara ti besai reti. Keterubah, GPS dekaka Perintah Malaysia ditumbuh enggau lengkas.
“Ba penemu GPS lebuh nya, Tan Sri Muhyiddin ngembuan penau bulih majoriti Kaban Parlimen ba Aum Parlimen, nya kebuah iya ulih numbuhka perintah baru.
“Nasib amat kami ngaga pemutus ti betul laban Muhyiddin udah dichiri nyadi Menteri Besai, udah nya Covid-19 ngerekai ba menua tu.
“Kedua, Datuk Seri Anwar Ibrahim nya disukung DAP,” ku iya nyemetak madah.
Sama datai Sapit Presiden PRS Datuk Joseph Salang, Ketuai Raban Indu PRS Datuk Seri Doris Brodie, Sekretari Besai PRS Datuk Janang Bungsu enggau Ketuai Raban Nembiak PRS Datuk Snowdan sereta bala bukai
