Kami Pakan tubah randaka pemansang

Pemansang infrastruktur iya nya siti pemansang ti pemadu beguna lalu patut dikemeranka ungkup rayat enda ngira sekalika sida diau di mengeri tauka ba menua pesisir.

Serak tu Suara Sarawak ngelansa randau enggau sekeda peranak menua Pakan bekaul enggau pemansang infrastruktur ke udah bisi dibai perintah di menua nya.

MEDAN ANAK MERABAI , RUMAH UKAN, ULU KOTA

“Enti dibanding enggau menua bukai dalam timpuh pengelama 20 taun ke udah, kami ditu agi jauh tinggal ari sukut pemansang infrastruktur. Kebuah munyi nya kami ditu agi betengahka jalai batang sereta agi tubah randaka pemansang baka ba menua bukai.

EDWIN ANAK DUNGGAH AMUT, PAKAN.

“Entara pemansang infrastruktur ke pemadu beguna ba kami baka bekal ai beresi enggau arus internet. Nyadi dua pekara nya patut diperundingka perintah enggau lengkas ke pemaik rayat ditu. Jam ke diatu kitai bela nemu bala anak beguna amat ke arus internet ke menyana dikena sida nitihka program Belajar enggau Ngajar Ari Rumah (PdPR).

LEYOM ANAK BUJANG
RUMAH GUYANG, SUNGAI RUSA

“Setipak enggau ubah pemansang kemaya haro, pelilih Pakan patut udah bisi perengka guna baka Bank. Tu beguna amat ngambika peranak ditu enda ibuh undur ke pasar Sarikei tauka Sibu. Enti nurun kin sida begunaka belanja ke besai. Nya siti ari juluk ati aku ungkup pemansang Pakan.

LAWRENCE VALENTINE KHAPAT
RUMAH TAYAN

“Ukai deka mejah sapa-sapa diatu udah manggai taun 2021 tang pemansang infrastruktur ke menyana baka jalai alun, bekal ai beresi enggau arus internet di Pakan ditu agi bedau ngemantup ati. Ambika chunto maya nengah jalai alun enti musin kemarau nyau bedebu gari, kekadang berasai malu meda pendiau entukar balat kamah dikena ke pasar, pia mega enti musin landas jalai chukup lichau nyadi nya balat ngeruga pengelikun mensia mayuh. Arapka raban bekaul beratika penanggul kami di menua tu.

Suara Sarawak