KUCHING: Tim Raban Nembiak GPS udah sedia kenyau dua taun ke udah napi sebarang maya diatur Pengawa Bepilih Besai Nengeri Ke-12 (PRN-12) .

Tuai Raban Nembiak PBB Datuk Gerald Rentap Jabu madah, pekara ke ngasuh sida lebih sedia nyentuk ke renggat baruh iya nya bekaul enggau atur bejalaika Undi 18.

“Kitai nemu raban nembiak chukup landik ba media rama lalu nengah Undi 18 sada nyawa sida didinga.

“Nya alai, kitai berengkah madah ngagai sida pasal polisi perintah Sarawak lebih agi pasal Bajet 2022,” ku iya maya dirandau Suara Sarawak ensana.

Rentap mega ngaku mayuh penerang ke ditemu ba ujung jari nyadi pemar dikena ngulihka sukung ari nembiak rebak baru.

“Nya alai, kitai ngaul rebak baru nyadi raban dalam rintai kaunsil perintah menua baka nyadi kaunselor awakka sida masai penemu baka ni sesebengkah projek perintah digaga.

“Tambah mega, ba renggat pating enggau pampang mega, kitai nulung rebak baru ngamatka peminta sida,” ku iya.

Berebak enggau nya, iya madah atur ti ngaul rebak baru baka kaul “apai indai enggau anak”.

“Nyema anak minta utai apai indai sigi naka ulih meri.

“Tang, laban ke nyadi anak sida patut nitih sereta bebasaka apai indai sida,” ku iya.