KUCHING: Kaban Parlimen Santubong Datuk Seri Dr Wan Junaidi Tuanku Jaafar andalka Program Ngemaruka Mengeri (Urban Renewal Development) ulih digaga ba Kampung Bako.
Iya ti mega Menteri ba Opis Menteri Besai (Parlimen enggau Undang-Undang) madahka Kampung Bako entara kampung lama ti beumur lebih ari 100 taun ti patut dikemansang.
“Aku deka betemu enggau Premier Sarawak (Datuk Patinggi Tan Sri Abang Johari Tun Openg) bagi berandauka makanisme ngemansangka kandang menua ti ngembuan sejarah lama ditu.
“Aku pan bisi nerima timbal peranak kandang menua ti madahka bisi chara ungkup ngemansangka menua sida ngagai tikas ti lebih manah,” ku iya.
Wan Junaidi bejaku munyi nya rambau aum pemberita Program Kenduri Rakyat di Kampung Bako Hilir ditu kemari.
Ku iya, peranak di kandang menua nya ngarapka enggau nyukung program tu ungkup meri pengelantang pengidup ti lebih meruan nengah perengkaguna ti disediaka perintah.
“Nya deka meri ubah transformasyen ti dinamik ngagai palan Melayu enggau Bumiputera di serata Sarawak,” ku iya.
Rambau program kemari, Wan Junaidi mega mantaika sekeda projek ti deka dipejalaika ba Kampung Bako Hilir enggau Kampung Bako Tengah beungkus RM1.7 juta.
Ku iya, bantu tu mungkur nyeruri Jematan tebelian Lorong 1, Lorong 3 enggau Lorong 4 beungkus RM750,000 ti dipejalaika dibaruh Opis Menteri Pengawa Berumah enggau Kandang Menua (KPKT).
Nangkan nya, bantu tu mega mungkur nyeruri jalai tebelian ngagai jalai semin di Lorong Bakawi Mos (132 meter), Lorong Haji Hasan (77 meter) enggau Lorong Haji Sulaiman beungkus RM200,000 dibaruh Opis Menteri Pemansang Menua Pesisir (KLPB).
“Perintah mega deka ngaga jematan baru di Haji Indra di baruh Opis Pemansang Konstitusyen Nengeri Sarawak (SDO) beungkus RM250,000.
“Tu mega nyengkaum projek ngaga jematan baru di Lorong Haji Putit enggau Lorong 2 di Kampung Bako tengah ti dipejalaika ba baruh KPKT beungkus RM550,000,” ku iya.
