Kampung Salak terus ngasaika pemansang

PANTA DAMAI: Taja bepalan ba sebuah pulau sereta jauh ari menua bukai tang nya nadai nagang Kampung Salak ba sitak Dun Pantai Damai bela ngasaika pemansang baka genturung pendiau bukai.

Menteri Muda Ba Opis Kepala Menteri (Pekara Islam Enggau DBKU), Datuk Dr Abdul Rahman Junaidi madah, Kampung Salak diatu majak mansang sereta disikap enggau perengka guna pemun baka karan, enggau ai nyengkaum arus penyambung dikena nentuka sida ulih meda dunya luar.

Maya bejadika Program Pantai Damai Prihatin 2021 ba Kampung Salak kena Hari Enam tu tadi, Adun Pantai damai nya madah mayuh program udah dilanggur dikena nyungkak aktiviti dagang temuai ba endur nya baka inap desa, neresa tasik enggau ngenahka pemakai tasik.

Dr Abdul Rahman madah, komuniti ba menua nya mega dibantu nengah Program Pemansang Rumah Rayat Mesekin (PPRMS) ke mungkur pengawa nyeruri rumah.

Ku iya, bemacham program pemansang lebih agi bekaul enggau Program Transformasyen Menua Pesisir (RTP) deka terus dipejalai sereta dikemujur ba sitak Dun Pantai Damai.

Berebak enggau nya, Dr Abdul Rahman madah Program Pantai Damai Prihatin siti program baru ti ngemeratka pengawa mantu orang tusah.

Iya ke mega Mandal Presiden Parti Pesaka Bumiputera Bersatu (PBB), madah, pengawa meri bantu nya lebih sistematik laban semua pati PBB bela ngambi bagi ba pengawa nyadung bantu nya.

Ku iya raban sida udah ngelawa 43 buah genturung pendiau lalu meri bantu nya datai ari 108 ruang bilik.

Nangkan nya ku iya, bantu nya kebendar udah berengkah kenyau bulan March taun nyin kemari nyerumba Atur Mindah Betagang (PKP).-Ukas

NULUNG RAYAT…Dr Abdul Rahman benung nyuaka bantu ngagai peranak Kpg Salak.