ASAJAYA: Perintah Sarawak udah nyendia agih belanja RM250,000 ba baruh Program Transformasyen Menua Pesisir (RTP) dikena ngaga entepan entukar enggau pengawa nangkir balai ba Kampung Sampun Gerunggang ditu.
Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madah, Kampung Sampun Gerunggang enda dikelaung ari perambu pemansang ti udah diatur.
Iya madah, nya nyengkaum pengawa nangkir jalai genturung pendiau, ngaga jematan, nyeleti balai enggau ti bukai.
Nya alai ku iya, agih belanja nya diberi ngagai genturung pendiau nya beserimbai pengawa ngintu Gawai Dayak.
“Sitak Sebuyau, Muara Tuang, Asajaya, Stakan, Simunjan enggau Gedong benung chakah bejalaika projek pemansang ti udah diperambu Perintah Sarawak nengah Ejensi Pemansang Begulai Wilayah Samarahan (IRSDA) begulai enggau ejensi pengatur ti bukai.
“Nya alai, aku ngarap projek pemansang ti udah dikemendar enggau diperambu tu ulih meri pemaik sereta nyungkak penatai pemisi ngagai komuniti genturung pendiau ditu,” ku iya.
Karim mansutka jaku nya rambau Pengerami Gawai Dayak Begulai Sejalai Pelilih Asajaya 2023 ba Kampung Sampun Gerunggang ditu, sehari tu.
