SERIAN: Kampung Tebakang bisi penau nyadi sitak eko dagang temuai lalu patut regas agi ngatur bemacham aktiviti lebih agi bekaul enggau main asal.
Beduduk ari nya, Kaban Parlimen Serian Datuk Seri Richard Riot Jaem, nyemetak madah raban Opis Kaunsil Pelilih Serian deka ngatur program komuniti enggau suah agi dikena meransang aktviti sosioekonomi genturung pendiau nya awakka richah sepanjai taun.
Kenu ku iya, kampung Tebakang bepenau digaga baka pasar Siniawan di pelilih Bau ke seruran penuh ditapatka mensia laban genturung pendiau nya seruran bisi ngatur aktiviti main asal.
“Pasar Tebakang dulu suba disema baka ‘nyawa-nyawa ikan’ tang diatu udah berubah nyadi palan ditapatka beribu iku mensia nyentuk aktiviti pan diatu kenyau ensana (23 Julai) mujur mechah rikod penatai temuai luar enggau dalam menua.
“Enti Siniawan ulih ngatur aktiviti ninting minggu nama kebuah Tebakang enda ulih? Nyadi aku deka raban Opis Kaunsil Pelilih Serian saut pemar tu awakka kitai besaup ngaga Tebakang nyadi palan ditapatka temuai ninting taun,” ku iya maya bejadika pekit Ratu Bilanting, di Kampung Tebakang Dayak malam kemari.
Riot mega meri jaku puji ngagai ejensi bekaul sereta kerejasama ari peranak genturung pendiau nya dalam ngemujurka Pekit Berakit enggau mayuh ke bukai ba genturung pendiau nya.
“Pengerami dua hari nya udah mujur nyungkak ekonomi rayat, rumah inap ditu penuh magang, bansal bejual mega dedat laban mensia,” ku iya.
Berebak enggau nya, champion Ratu Bilanting ke mega ngempu gelar dara bajik Pekit Berakit Serian edisi Ke-10 dipenggi Joy Angela ti ngemataka iya mai pulai perais mata duit RM1,500 nyengkaum trofi, jumpang enggau setipikit.
Penuduk lumur dua dipenggi Auxilia Rose ke nerima perais RM1,000, trofi enggau setipikit ditangkan Agnes Sipin mai pulai perais RM750, trofi enggau setipikit.
