Kapit diatu bisi ‘ikon’ baru

KAPIT: Pemansang ba menua Kapit deka terus ditambah ngambika rayat ba sitak tu terus ngasaika pengelantang sebaka enggau rayat ba mengeri besai.

Sapit Kepala Menteri Sarawak ke mega Tan Sri Datuk Amar Dr James Jemut Masing madahka projek Tebing Sungai Kapit tu deka nyadi siti ari ikon di Kapit.

“Aku gaga ati meda mensia mayuh nguna palan tu dikena ngelantangka ati,”

“Nya alai kitai patut nyaga pemeresi palan tu ambika beresi belama laban tu mih palan alai kitai ngatur mayuh program dudi hari ila,” ku iya.

Iya ke mega Menteri Insfrastruktur enggau Pemansang Penyangkai Kapal, madah munyi nya rambau bejadika Projek Tebing Sungai Kapit ditu, malam ensana.

Projek Tebing Sungai Kapit tu udah nguna agih belanja sepenyampau RM3.8 juta bagi Fasa 1 aja sereta udah diperambu deka digaga bagi Fasa 2.

Kelimpah ari nya, Masing enggau ejensi perintah ke bukai udah meda taba ke patut alai endur ngaga jematan dikena ngelayang ke seberai ngagai Menuan enggau Ibau lalu mungkur semua jalai mua ke sepiak pasar Kapit.

Jematan ngelayang ke seberai ari Pasar Kapit tu ditaga deka digaga ngila Ulu Bleteh mimit.

“Nya alai udah diperambu dini kitai deka ngaga sebuah jematan dikena ngelayang ke seberai pasar Kapit,”

“Pasar Kapit ti baru mega udah diperambu deka digaga mua ke seberai beduduk ari pasar Kapit ke diatu udah sekut enggau pemayuh mensia,”

“Nengah jematan tu ila diak sekeda jalai deka digaga ngagai Pelagus lalu ke Merit rembus ke Tatau enggau Bintulu sereta rayat ulih terus nengah jalai tu enda rembus nengah jalai ke Sibu,”ku Masing.

Naka tu, sepenyampau 16KM Jalai Menuan ke nguna agih belanja RM58 juta enggau 14KM Jalai Ibau nguna agih belanja sepenyampau RM54.9 juta.

Masing madah enti sebuah projek udah diperambu enggau deka digaga ukai meseti alu tembu tang begunaka sekeda masa endur bulih bajet ke chukup kena ngaga nya.

“Sekeda projek deka nguna agih bajet ti besai nya kebuah iya begunaka masa ti lama laban kitai ukai baka ngaga jalai kebun,”

“Lily Pond, Town Square, Jalai Menuan enggau Jalai Ibau sereta Terminal Ekpres Baleh/Belaga udah bisi bajet lalu kami pengari rayat amat ngarapka rayat ulih beserakup nyukung pengari rayat ke diatu ngemansangka menua tu,”ku iya.

Sama bisi datai Kaban Parlimen Kapit, Datuk Alexander Nanta Linggi, Kaban Parlimen Hulu Rajang, Datuk Wilson Ugak Kumbong, Adun Bukit Goram, Jefferson Jamit Unyat, Adun Pelagus, Wilson Nyabong Ijang sereta bala bukai.

PELIN PEMANSANG…Pelin Tebing Sungai Kapit Fasa 2 ke udah dilangkar.

Suara Sarawak