Kapit mesti pukas ari Covid-19

KUCHING: Kaban Parlimen Kapit Datuk Seri Alexander Nanta Linggi deka nentuka Kapit pukas ari penusah pengerai igi penyakit Covid-19.
Ku iya, iya chukup ngemeratka penanggul ke dibai igi penyakit nya ba pelilih menua nya dalam kandang berapa minggu ke udah tang enda mudah berasai lantang taja nadai kes baru dirikodka naka ke diatu.
Naka ke diatu ku iya, bisi dua kes dirikodka di Kapit ti nyadi ngagai siku peranak luar enggau siku peranak menua tu ti nyadi kenaka 2 enggau 13 Januari tu tadi.
Berindik ari nya ku iya, bisi 13 menua ti mungkur 149 pintu rumah panjai di Kapit enggau Song kena sekat pejalai berengkah ari 3 ngagai 16 Januari tu.
Pekara nya nyadi ketegal irauka sekeda ari peranak rumah panjai nya nyadi kaul semak ngagai kes positif Covid-19 sebedau tu.
“Opis Parlimen aku enggau Adun Bukit Goram deka bekerejasama enggau piak penerit adat ba pengawa nagang pengerekai igi penyakit Covid-19 tu.
“Aku mega benung berandau bekaul enggau bantu ti ulih diberi ngagai peranak ti kena tinggang oenusah tu,” ku iya madah ba siti penerang, kemari.
Nanta ti mega nyadi Menteri Dagang Dalam Menua enggau Pekara Pengguna (KPDNHEP) madahka pengari iya ba opis Parlimen Kapit deka seruran madah sereta ngaduka penerang enggau bantu ti ulih diberi.
“Pekara ti pemadu beguna iya nya nitihka atur operasyen standard (SOP) ti udah ditetapka perintah enggau Opis Menteri Pengerai Malaysia (KKM) sereta seruran ngemeratka chara baru.
“Tu nyengkaum ngena sengkabung mua, nyaga takah enggau pangan diri, masu jari sereta enda begempuru ba endur ti sekut,” ku iya.
Nanta mega pechaya, enti rayat ulih diajar sereta nagang diri enggau diri sebilik, pengerekai igi penyakit tu ulih ditagang ukai semina di Kapit tang mega di Malaysia.