Karan enda ulih dijual murah

Sarawak deka berunding enggau Sabah sereta Brunei

“Enti Sarawak mayar enggau rega ti tinggi, sida (Brunei) mega patut mayar enggau rega ti sama.”

KUCHING: Perintah Sarawak deka berunding enggau Sabah sereta Brunei bekaul pengawa nyual bekal karan nengah Sarawak Energy Berhad (SEB).

Kepala Menteri Datuk Patinggi Abang Johari Tun Openg madah runding nya benung beratika pekara bekaul enggau rega.

“Sida minta rega baruh agi ari kitai, tang aku madah enda ulih.

“Enti Sarawak mayar enggau rega ti tinggi, sida (Brunei) mega patut mayar enggau rega ti sama,” ku iya.

Abang Johari mansutka pekara nya lebuh bejaku ba pengerami Gawai Raya Sarawak Energy Berhad (SEB) begulai enggau Kepala Menteri di Menara SEB ditu, kemari.

Nangkan nya, Abang Johari madah enti pengawa berunding nya ulih dijapai, nya ulih nambahka agi orang meli ari luar Sarawak.

“Naka tu, SEB udah nyual bekal karan ngagai Kalimantan, Indonesia.

“Perintah Sarawak diatu benung beratika Jakarta, ti bisi penau meli karan ari Sarawak,” ku iya.

Ku Abang Johari, enti Indonesia ngaga pemutus dekaka mayuh agi karan, kitai ulih bekerejasama lalu nya siti ari penau alai kitai ngerembaika agi makit bekal karan di Borneo jemah.

Rambau pengerami nya, sama bisi ngulu bini Abang Johari Datuk Amar Juma’ani Tuanku Bujang, Menteri Utiliti Datuk Seri Stephen Rundi Utom, Menteri Muda Bekal Karan Menua Pesisir Datuk Dr Abdul Rahman Junaidi, Chairman SEB Datuk Amar Abdul Hamed Sepawi, Ketuai Pemesai Eksekutif SEB Datuk Sharbini Suhaili sereta Ketuai Gawea Raya SEB Sipol Ambun.

NUTUP GAWAI… Datuk Patinggi Abang Johari Tun Openg (tiga kanan) enggau Sipol (kiba) benung nanchang tikai ke baru udah digiling seraya dikemataka Rundi (tiga kiba) kelai nutup pengerami Gawai Raya SEB kemari.-Gambar Ramidi Subari