KUCHING: Raban pengemeran muzik tauka anak seni Sarawak diperansang ngerejister Statutory Declaration (SD) ngambi nyaga hak ba karya seni sida.
Penulung Pemesai Penguatkuasa Opis Menteri Dagang enggau Pekara Penguna (KPDNHEP) Sarawak Maruni Langga madah, hak karya seni sida ulih dijaga nyentuk 50 taun pengudah midang.
Ku iya, SD pemadu beguna lebuh anak seni minta hak karya seni enggau bayar royalti ba asil seni nya.
“SD tu baka surat pengada anak kitai, taja bala semenua nemu nya anak kitai tang lebuh dibai ngagai undang-undang, iya enda ulih dikumbai anak kitai empu enti nadai surat pengada.
“Baka nya mega SD, lebuh kita deka minta hak ba karya seni enggau bayar royalti, tu meh surat ti diguna. Enti enda, kitai semina ulih bejaku ngapa,” ku iya.
Maruni bejaku munyi nya ba randau webinar Music Right Sarawak Berhad (MSRB) senentang Bagaimana Akta Hak Cipta Melindungi Pengkarya malam, ensana.
Iya madah, SD ulih nyaga hak karya seni manggai 50 taun pengudah penengkebang nya midang, lalu bayar royalti diberi ngagai orang ke sebilik baka bini tauka anak.
“Bisi dua kategori karya seni dijaga nengah SD baka Seumur Idup Plus 50 Taun enggau 50 taun.
“Ba kategori Seumur Idup Plus 50 Taun, asil seni baka litericha, seni enggau muzik deka dijaga.
“Kategori ’50 Taun’, asil tengkebang ti deka dijaga mungkur filem, rikoding, dokumentari enggau tengkebang perintah,” ku iya.
Langga madah, waris penengkebang ulih bulih bayar royalti ngagai asil karya ti dikomersil.
“Asil karya mega ulih diwariska ngagai sebuah gerempung berkanun ti ngembuan lisin baka MSRB.
“Lebuh midang, bayar royalti tengkebang kita nya ila deka diaturka organisasyen tu awakka bisi dibagi ngagai waris kita empu,” ku iya.
Iya nyemetak madahka, SD mesti direjister keterubah tengkebang nya digaga ngagai ejensi aku besumpah.
“Nyema kita ngaga lagu suba, diatu baru deka ngerejister SD enda ulih agi laban lagu nya mayuh udah bebalut tauka dilaguka orang bukai.
“Nya alai, udah kita ngaga sesebengkah tengkebang, terus register SD awakka kuasa tauka hak penuh produk nya pulai ngagai kita,” ku iya.
Langga madah baru, SD bisi dalam tiga bengkah iya nya SD kediri, SD serikat enggau SD begulai.
Webinar ti atur nya disereta urung 25 iku raban penengkebang seni seraya dipandangka terus ba facebook live MSRB.
