KUCHING: Penyadi bah di Batu Kawa ukai pekara baru ditapi peranak ba genturung pendiau nya laban palan tu suah napi penusah bah ngelama tu.

Lebuh ujan bangat, peranak di Batu Kawa suah napi penyadi bah ngenyit ngujungka ai bah tama ngagai rumah lalu ngampuhka kereban dalam rumah.

Ngelansa penyadi bah ti balat sebedau tu, Batu Kawa kala napi penyadi kes bah balat ba pun taun 2021 urung bulan Januari enggau March.

Ai tama ke dalam rumah urung dua kaki setengah peninggi ti balat ngampuhka kereban rumah baka jemari, barang dapur, peti ais, mesin basu, pinggai, mangkuk enggau ke bukai.

Lebih balat enti ai tu ngemasahka barang ti mar rangkai baka tilam enggau gari ngujungka barang nya bebau kuap sereta bekulat.

Ku Lina Jomek, sepengelama diau ba Batu Kawa sida sebilik balat ngasaika penanggul ketegal bah lebuh ai tama ke rumah.

“Ai tama ke dalam rumah ngenyit, kadang nyau enda sempat mindahka barang.

“Suah amat entukar berendam dalam ai, barang mayuh jai baka kusyen bangku, tilam, kain, baju, kantung sekula nembiak, bup bala anak enggau ke bukai, sigi nyau retai magang,” ku iya lebuh dirandau Suara Sarawak, kemari.

Lina madah, ejensi perintah kadang laun datai mantu sida laban raban nya mega mantu peranak ba palan bukai ti bela napi penanggul nya.

“Agi suba lebuh keterubah mindah kitu, aku nadai entukar, ngarapka orang meh ngangkut kami mindah ngagai palan ngenduh sementara.

“Laban rumah aku bisi dua ringkat kira pama gi meh bisi sadau endur diau, nya pen dikumbai sida enda ampuh laban rumah dua ringkat tang kami ti ngasaika penanggul tu berasai endar meresi rumah enggau meli baru barang ti jai.

“Enti ulih, aku minta perintah meri bantu ngambi ulih nyadika puku dikena kami meli barang ti udah jai laban bah, ukai mimit ga rega barang ti udah jai laban bah tu kadang manggai beribu ringgit,” ku iya.

Lebuh bekunsika peneleba diau ba Palan Ngenduh Sementara (PPS), Lina madahka sida endang dijaga manah sereta meruan.

“Bala pemesai pen bisi ngundang, tang ungkus bayar pampas rumah ti dituntung bah semina sekeda rumah aja ti bulih.

“Suah mega pekara tu dibai aku ngagai bala pemesai ti ngatur, madah ngagai sida pasal rumah suah ampuh maya ujan bangat nyadi,” ku iya.

Ku Lina, penyadi penusah bah tu suah dibantaika sida ngagai pengari rayat sereta pemesai kaunsil kandang menua.

Iya madah, bala pengari rayat enggau ejensi perintah deka bejalaika projek nyeleti parit ba genturung nya awakka ulih mutarka penyadi kes bah ba Batu Kawa tu.

“Nyentuk diatu, kami agi nganti projek parit ti ku sida nya, tang lalu apin dipeda pengawa nya dipejalai, semina aku bisi meda projek nyeleti parit ba palan bukai enda jauh ari kami ditu.

“Aku ngarapka projek nyeleti parit tu lengkas dipejalai awakka kami ti diau ba ditu enda nangi ninggalka rumah, enda nangi rumah bah enggau lantang ati maya musin pengujan.

“Minta perintah anang terunda ngaduka projek parit nya awakka kami ti nguan kandang menua tu lberasai ikun enggau lantang,” ku iya.

Berebak enggau nya, Penghulu Iban di Batu Kawa, Stanley Repon madahka, iya pen agi nganti berita baru ari perintah enggau Opis Parit enggau Entali Ai (DID) bekaul projek mutarka penusah bah ti suah nyadi ba Batu Kawa.

“Tebal agi bah suah nyadi ba baruh din (Lorong 5J enggau Lorong 5I).

“Nyentuk diatu aku agi bedau nemu kuing tuju pasal projek nyeleti parit nya, laban aku bedau nyengala meda pengawa sida tu lalu apin dipejalai.

“Genturung pendiau ba dia sigi tanah baruh, nya alai aku andalka penanggul ti ditapi peranak ba dia jampat diputar,” ku iya.

Stanley madah, DID patut ulih mutarka penanggul tu manah awakka ulih meri pemaik, pengelikun enggau pengelantang ngagai rayat.

Dulu ari nya, kena 31 Januari 2021 Sapit Premier Sarawak ti mega Adun Batu Kawa Datuk Seri Dr Sim Kui Hian madah, penanggul bah ngenyit di Batu Kawa deka diputar pengudah projek nyeleti sistem parit enggau sapat bah dipejalai.

Ku iya, projek beungkus RM120 juta tu dipejalaika DID Sarawak di baruh Langgur Pemansang Malaysia Lumpar Ke-12 (RMK-12) 2021-2025).

Iya madah, projek tu mungkur pengawa nyeleti sistem parit di Jalai Batu Kawa Lorong 1C enggau 3, Sungai Moyan, Sungai Surih, Jalai Field Force, Jalai Ketitir, Desa Wira, genturung RPR enggau ngaga sapat tebing sungai Kampung Sinar Budi Baru.