Kastam mujur ngerampas empelesut ikan berega RM360, 000

SIBU: Opis Kastam DiRaja Malaysia (JKDM) mujur ngerampas sebuah kutak ngundan empelesut ikan berega RM360,000 ti deka dieksport ba palan meresa MAS Kargo Padang Bilun Sibu, Hari Dua tu tadi.

Direktor Kastam Sarawak, Herman Shah Abdullah madahka kutak nya ditemu asil pengawa meresa dipejalai raban Unit Penerit Adat begulai enggau Unit Kargo Udara urung pukul 11.40 pagi.

Ku iya, lebuh meresa tumu, kutak nya ditulis keropok dalam dokumen nganjung barang dikena ngelalai barang nya ari ditemu ejensi penerit adat.

“Bisi enam kilogram (kg) empesut ikan udah dirampas dipelaba berega manggai RM360,000.

“Asil pansik silik, sida udah ngetan siku lelaki peranak menua beumur urung 40 taun ngambi mantu pengawa mansik pasal barang dalam kutak nya,” ku iya nerang, ditu kemari.

DIRAMPAS… Sekeda empelesut ikan ditemu dalam kutak nya udah dirampas.

Nambahka nya ku Herman, modus operandi aktiviti nya dipechaya deka dieksport ngagai sebuah menua Asia Timur ngena servis serikat nganjung barang.

Terang Herman, barang kes nya berega enggau nerima peminta tinggi ba makit menua luar ungkup pengawa berubat altenatif enggau ai irup.

Iya nyemetak madahka kes nya diatu dipansik di baruh Seksyen 135(1)(a) Akta Kastam 1967 bekaul pengawa eksport barang nadai kastam tauka eksport barang ditagang.

“Enti ditemu salah, pesalah ulih diukum enda kurang ari 10 kali lipat penyampau chukai kastam tauka dijil enda kurang ari enam bulan enggau enda ngelui ari lima taun,” ku Herman madah nyemetak.

Suara Sarawak