KUCHING: Menua Amerika Syarikat (AS) deka negapka kaul enggau Sarawak dalam pekara pengelikun kuasa, nyaga rampa menua enggau negapka nembiak.

Duta Besai AS ke Malaysia Brian McFeeters madahka iya bisi betemu enggau Premier Sarawak Datuk Patinggi Tan Sri Abang Johari Tun Openg bagi ngerandauka kerejasama entara AS enggau pemesai perintah, serikat kuasa, pakar rampa menua enggau ubah gaya hari sereta raban tuai nembiak.

“Sarawak ngembuan bala nembiak ti regas ti deka nyadi raban tuai dalam ngeluarka kuasa ulih dikemaru sereta ngintu rampa menua Malaysia jemah ila.

“Kami ransing deka meranakka puku ungkup ngemansutka tuai jeman ti deka datai ba Sarawak ti ulih negapka kerejasama dalam isu kuasa enggau ngintu rampa menua awakka sama ulih ngelaban krisis ubah gaya hari diatu,” ku iya.

Brian bejaku munyi nya rambau aum pemberita Duta AS ke Malaysia di Palan Sarawak Biodiversiti ditu, pagi tadi.

Ku iya, entara pekara ti dirandau enggau Abang Johari iya nya Perintah Sarawak mantaika pengeran ngagai perintah AS nengah kaul kuasa beresi ngelaban krisis tu.

“Premier madahka juluk ati Sarawak dalam nyendiaka kuasa ulih diempu, ulih dipechaya enggau ulih dikemaru ba rantau tu.

“Serikat ba AS ulih nyukung Sarawak dalam ngintu ubah kuasa nya nengah raban bepenau dalam teknologi tinggi enggau pemansang infrastruktur,” ku iya.

Iya nangkan nya, madahka AS meri perati ngagai isu pengelikun kuasa lebuh betemu enggau raban ari Sarawak Energy Berhad (SEB).

Ku iya, pengulih dalam melanja tauka penemu teknikal AS ulih nyukung SEB dalam bejalaika projek kuasa matapanas enggau hidrogen gadung.

Brian madahka, penemuai kepenudi ngagai Kaunsil Kampung Sarawak enggau Palan Biodiversiti Sarawak deka ngerandauka pengawa kolektif nengeri dalam ngintu enggau nyaga biologi menua tu.

Iya nangkan nya nyemetak madahka, perintah AS deka nyukung dalam nyendiaka bantu teknikal, negapka kaul sainstifik, dagang enggau akademik entara AS enggau Malaysia mutarka krisis gaya hari ti ditapi dunya diatu.