Kaul China-S’wak semampai ditanggam rat

KUCHING: Bida pemesai dandang tanah Sarawak enggau China enda natak kaul entara kededua menua nya.

Konsul Jeneral Rayat Republik China di Kuching H.E Cheng Guang Zhong madah taja menua China besai agi ari Sarawak tang tu enda nekul kaul ekonomi entara kededua menua tu ditanggam.

“China enggau Sarawak, Malaysia nanggam kaul ari mayuh bengkah pengawa baka pengawa berumah, injin, kuasa gadung, betanam, kandang tasik, ekonomi digital sereta ke bukai.

“Kaul tu mega manahka pengawa dagang temuai ke alai nyentuk taun 2018, urung 150 juta temuai ari China nemuai ke Malaysia,” ku iya.

GuangZhong mansutka jaku tu rambau Workshop Ekonomi enggau Nerang Polisi Kerejasama entara China enggau Sarawak berambaika jaku ‘Pengawa Berunding, Gawa, Bekunsi Pemaik enggau Bela Untung’ bepalan ba sebuah hotel tebilang ditu, tadi.

Pia mega ku GuangZhong madah China deka ngatur forum kedua Kerejasama Entarabansa ‘Kaul enggau Jalai’ di Beijing taun tu.

“Forum tu kelai inisiatif nyendiaka peluang kaul entara China enggau Sarawak.

“Ngarapka kaul kededua menua tu deka semampai ditanggam manah nentuka sejarah entara kitai ulih ditan,” ku iya.

Iya mega ngarapka semua komuniti ulih ngetanka kaul, ngelakuka dagang enggau ekonomi sereta ngerapitka sintal kaul kededua menua ti udah lama ditanggam nyadi kunchi pemujur inisiatif tu.

Bela datai Sapit Kepala Menteri ti mega Menteri Pemansang Mengeri Enggau Pengeraja Asal Kedua enggau Menteri Industri enggau Pemansang Pengawa Dagang, Datuk Amar Awang Tengah Ali Hasan, Menteri Muda Pemansang Dagang Mit enggau Jelan Pemesai (PKS) ti mega nyadi Menteri Muda E-Dagang Datuk Naroden Majais sereta Menteri Muda Industri enggau Beranakka Puku, Malcolm Mussen Lamoh.

KAUL TEGUH… Datuk Amar Awang Tengah Ali Hasan (duduk lima kanan) begambar ungkup kenang begulai enggau bala bukai disempulang Datuk Naroden Majais (duduk empat kanan) enggau Cheng Guangzhong (duduk lima kiba). – Gambar Marvin Kudang.

Suara Sarawak