Kaul eko dagang temuai Kalbar-S’wak ditempa

LUBUK ANTUK (Kalimantan Barat): Yayasan Utai Idup Sedunya (WWF) Indonesia enggau Malaysia ransing nempa rentayan eko dagang temuai entara kededua menua.

Ketuai Projek Inisiatif Gaya Hari Entarabansa (IKI) Kalimantan, Jimmy Syahirsyah madahka pengawa nempa rentayan eko dagang temuai tu ngena manah garis entara menua Kalimantan Barat enggau Sarawak.

“Kitai beratika garis entara menua di Badau-Lubok Antu nyadi jalai penama besai temuai entara kededua menua (Indonesia enggau Malaysia).

“Nya alai kitai deka nyendiaka pakej dagang temuai lalu dikena nyapai tuju tu, randau keterubah dalam bulan September taun nyin tadi udah diatur di Sri Aman,” ku iya.

Iya mansutka jaku nya lebuh berandau begulai enggau raban WWF Malaysia enggau lima pengemeran media ari Sarawak di pelilih Hulu Gurung ditu tadi.

NIMPAI… Jimmy Syahirsyah begambar melakangka Bukit Piabung, Desa Lubuk Antuk, Kapuas Hulu di Kalimantan Barat, Indoneisa.

Ku Jimmy, sida udah merambu ngemansangka Bukit Piabung, Desa Lubuk Antuk, Kapuas Hulu diangkat nyadi eko dagang temuai.

“Bukit Piabung tu agi bungas enggau rampa menua asal ti ngembuan 1,140 kaki peninggi sereta manah ungkup aktiviti matau bukit.

“Pia mega bisi lubang batu enggau ai wong di bukit nya,” ku iya nerang.

Ku iya, ba Malaysia, WWF Indonesia enggau Malaysia merambu deka ngemansangka Rumah Manggat, Ulu Menyang, Batang Ai diangkat nyadi palan eko dagang temuai.

“Genturung pendiau nya kaya enggau pengawa nanam teh gaharu ti engkeman diangkat nyadi eko dagang temuai enggau meruan.

“Kelimpah ari nya, kitai deka ngerembaika Taman Negara Danau Setarung besemak enggau garis entara menua Badau-Lubok Antu nyadi eko dagang temuai,” ku iya.

Nitih ku Jimmy, randau udah nya bekaul enggau pejalai eko dagang temuai WWF Malaysia-Indonesia deka diatur di Rumah Manggat dalam bulan Julai tu.

Randau tu ngaul pengari perintah ari Indonesia enggau Sarawak (Malaysia), sektor peribit enggau ejen dagang temuai, ku iya nerang silik.

“Dikena ngepunka pengawa, kitai ngemai bala temuai ari Malaysia tama ngambi beratika penyampat gaya pejalai sida.

“Tu nyengkaum imigresyen, kastam, perengka pengangkut entara kededua menua,” ku iya.

Udah nya ku Jimmy, bala temuai ari Indonesia deka dibai tama ke Sarawak lalu asil pengawa tu, kitai ulih beratika pengelemi enggau silik agi.