Kaul kerejasama tulang belakang penyerakup pupu bansa di S’wak

KUCHING: Tiga komiti nerima bantu sepenyampau RM15,000 nengah geran Projek Pemansang Mit Menua Pesisir (MRP) ari Perintah Sarawak.

Menteri Muda Pengelantang Komuniti Datuk Francis Harden Hollis ngagihka belanja bela penyampau RM5,000 ngagai JKKK Rumah Ringgit Ibol, JKKK Rumah Ayai enggau Biro Indu Putat, Sri Aman ditu.

Ku Harden, kaul kerejasama rat bala komiti nyadi tulang belakang penyerakup pupu bansa di menua tu.

“Kaul kerejasama ulih ngangkatka tikas pengidup rayat menua pesisir sereta nerenak ulah bebasaka pangan diri.

“Nya kebuah aku ngarapka penyerakup kitai di Sarawak enda lenyau ngapa ketegal bida penemu politik laban penemu orang luar semina deka ngeruga penyerakup kitai ditu,” ku iya.

Harden mansutka jaku tu lebuh bejadika Pejalai Lantang nyerumba Gawai Dayak 2019 Raban Indu Parti Sa’ati Rayat Sarawak (SUPP) ba Rumah Ringgit Bayang Ibol enggau Rumah Ayai Jabu Putat, Sri Aman apin lama ke udah.

Bala pengabang enggau temuai khas ti datai dirami ngena adat enggau basa ngena ajat ngelalu temuai enggau tempap gendang pampat.

Berebak enggau nya, pengawa nyuaka insentif ngagai bala nembiak nyulut ba peresa PT3 enggau SPM sereta sida ti nampung pelajar ngagai renggat pelajar tinggi ari rumah panjai nya.

Raban Indu SUPP diketuai Kaunsilor Kho Teck Wan madahka bisi 56 iku sida sebuat ngulu pengawa sehari nya.

Iya mega meransang peranak rumah panjai seruran ngemeran enggau ngetanka adat asal enggau basa ti ditampung sida kelebih agi maya ngelalu penatai bala temuai.

Sama datai Datin Simba Nalang, Temenggong Kueh Aik Seng, Kaunsilor Lansing Bansi, Protem Chairperson Raban Indu SUPP Pampang Lingga sereta bala bukai.

NGABANG… Harden nabi peranak rumah panjai ti ngelalu penatai sida sebuat ba Rumah Ringgit Bayang Ibol enggau Rumah Ayai Jabu Putat, Sri Aman apin lama ke udah.

 

KENANG JEMAH… Harden (lima kanan) enggau Datin Simba Nalang (tujuh kanan) begambar kenang begulai enggau Raban Indu SUPP diketuai Kaunsilor Kho Teck Wan lebuh ngabang.