Pengerami Mantar Gawai nya sebagi ari chara ngaul nembiak nyagu adat, main asal enggau pesaka kitai Dayak di menua tu.
Sapit Menteri Pelajar, Inovasyen enggau Pemansang Bakat, Datuk Farncis Harden Hollis madah, semua komuniti meseti bekerejasama mai, matak enggau ngirit rebak biak bisi pengerindu enggau pengingin nyagu pesaka asal kitai baka ngepan enggau budaya Dayak.
Ku iya, nengah Pengerami Mantar Gawai nya, kitai ulih ngirit enggau marit nembiak bisi asai temegah ke pesaka bansa diri enggau keran ngangkat pesaka nya ngagai orang luar.
“Pengerami Mantar Gawai mega diatur kelai pengaga ati enggau beterima kasih pengudah musin ngetau ti mai jereki ngagai komuniti Dayak.
“Tu mega kelai kitai deka ngintu Gawai Dayak ba selampur Sarawak ti udah digazet nyadi hari besai.
“Pengerami tu mega dikena kitai mandangka ngepan asal Dayak Iban enggau ngepan bukai di selampur menua.
“Tu mega nyadi pelasar peranak bekerejasama ngemujur bemacham pengerami.
“Kitai berasai chukup temegah laban Pengerami Gawai Dayak eksklusif diintu ba Sarawak.
“Kebuah pia laban Sarawak diuan mayuh raban bansa Dayak nyengkaum ba menua sepiak, Indonesia ti chukup rat enggau agi bisi kaul laban turai sejarah asal pemindah peranak,” terang iya.
PEMATAK TEMUAI
Harden nibar jaku nya ba Pengerami Mantar Gawai diatur Parti Sa’ati Rayat Sarawak (SUPP) Pampang Lingga ba Rumah Inchang Lagor, Kampung Skirau Ai, Lingga.
Ari sukut ekonomi, Harden madahka Pengerami Gawai Dayak nya pematak temuai ke deka meda pengerami kitai Dayak.
Nya alai ku iya, penatai bala temuai udah tentu nambahka penatai pemisi Sarawak.
“Ambika banding, kitai ngembuan bemacham chura baju burung lalu ukai semina bisi ba Sarawak tang mega ba menua sepiak baka ari Badau enggau ke bukai.
“Kelimpah ari ngepan asal, kitai mega bisi bemacham pengerami baka niti daun.
“Nama reti niti daun nya? Kebendar, rebak biak mayuh enda ngelala nama reti pengawa tu tang sida bisi ati deka nanya enggau deka nemu silik agi pasal pejalai pengawa tu.
“Bemacham penyelai deka ditemu rebak biak baka pengawa niti daun ke chukup nyelai lalu ngelai penyerakup kitai laban semua komuniti bekenaka pekayan asal baka raban bansa Bidayuh, Orang Ulu, Iban enggau ke bukai.
“Raban bansa Iban ngena baju burung enggau baju gagung, nangkin keresa bukai,” terang iya.
Terang Harden, kitai mega meseti nerang ngagai rebak biak nyema sida bisi deka pengingin ati nemu pesaka kitai.
Ku iya, chunto baka bulu burung ruai enggau burung kenyalang. Semua keresa enggau pengeraja tu mega ngayan enggau nunjuk penyelai kitai kediri empu.
“Semua penyelai tu deka matak temuai menua luar deka meda pekayan asal kitai Dayak. Ba renggat nengeri mega deka ngatur pengerami niti daun.
“Tu dikena mandang ngagai dunya senentang pengeraja enggau penyelai pekayan asal kitai Dayak,” terang iya.
BERAMI GAWAI
Kelimpah ari nya, Harden mega madah, Pengerami Gawai Dayak nya dikena kitai meri terima kasih laban udah tembu musin ngetau padi lalu diatu ukai semina ba orang bumai aja tang komuniti Dayak beterima kasih ke Petara laban diberi jereki belimpah.
“Chukup gaga meda mayuh kita serumah datai pulai berami dikena ngerichahka agi Pengerami Gawai Dayak.
“Tu meh maya kitai ngedut kaul enggau pangan diri ti lama udah enda betemu.
“Ngena peluang tu, meri Selamat Ngintu Gawai Dayak nuju semua.
“Besampika semua kitai diberi pengerai, pengelantang enggau penyenang.
“Arapka jereki semua kitai majak nambah, betuah belimpah lebih ari taun ke udah. Gayu guru gerai nyamai lantang senang. Oohaa!” ku iya.
Dulu ari nya, Chairman Pengatur Pengerami, Walterkiller James Junit madah, Pengerami Mantar Gawai nya diatur diken ngenang jasa kaban parti SUPP Pampang Lingga ti taluk ngagai parti nyadi pelasar bekunsi penemu.
Ba pengerami nya, Harden udah ngemendar agih belanja Projek Mit Pemansang Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) Rumah Inchang Lagor penyampau RM10,000 seraya Gerempung Indu nerima RM5,000.
Sama datai Penghulu Leonard Libau, Penghulu Komiti Manduh, Kaunsilor Balean Suji Inggol, Kaunsilor Wong Yii Hong, Kaunsilor Munan Angkau, Kaunsilor Micheal Pillow Lachen, Kaunsilor Magdalene Melayu enggau bala bukai.
