Kaul Polis – Komuniti ditanggam rat

BINTANGOR: Polis Meradong nampung tanggam kaul rat enggau mensia mayuh nyadi sebagi ari chara ngemunas penyalah kelimpah ngenyemakka diri enggau komuniti renggat baruh.

Penyikar gawa ngasuh bala komuniti berasai likun kelimpah nyadi sebagi ari chara sida ngenataika penerang ngagai polis pasal sebarang pengawa ti salah.

Setipak enggau juluk nya, Indu Opis Polis Pelilih (IPD) Meradong ngatur Program Komuniti Polis Begulai Enggau Tuai Rumah di Rumah Kiroh, Sungai Sebatu, Mador, Jalai KJD ditu, apin lama ke udah.

Program berengkah ari 11.30 pagi nya richah enggau penatai 130 penyereta datai ari bala tuai rumah, ketuai raban bansa enggau peranak diau ngelingi pelilih Meradong.

Entara isi program iya nya licha nagang penyalah, pengelikun ari penusah angus enggau penerang pasal raban ti patut ditanya tauka dilawa enti deka minta bantu.

UNGKUP KENANG… Bala temuai dipebasa begambar bebala mayuh begulai enggau peranak rumah panjai pengudah tembu program di Rumah Kiroh, Sungai Sebatu Mador, ditu.

Kelimpah ari nya, pengawa mandang dipejalaika Skuad Aman Wanita (Amanita), Pampang Nakotik Sarikei enggau Meradong mega bisi diatur ti ngiri mayuh penemu ngagai bala penyereta.

Temuai dipebasa ti sama datai iya nya Kaban Kunsil Nengeri (Adun) Meradong, Datuk Ding Koung Hiing, Ketuai Polis Pelilih Meradong Deputi Superitenden Polis (DSP) Sekam Anoi enggau Pemancha Pelilih Meradong Agan Luat.

Pemesai Opis Pengerai Meradong Jacky Charles, pengari Opis Bomba enggau Penyah Penusah Bintangor Hazman Bakar, Penghulu Abas Banyi, Penghulu Selah Jugi enggau Tuai Rumah Kiroh Ungga mega bisi datai ngerichahka atur program.

Berindik ari nya, Ding ba jaku dipansutka iya madahka bala komuniti ngembuan pangku pengawa besai amat nyadi mata enggau pending ngenataika penerang pasal penyalah ngagai polis.

Program baka tu ku iya endang patut dikerembaika ba rumah panjai bukai di Meradong dikena ngenegapka tanggam kaul entara polis enggau komuniti.

“Pengawa manah tu mega nunjukka pengeran polis ngemunaska penyalah enggau nyaga pengelikun komuniti.

“Tu mega seriris enggau sulu jaku ‘Polis enggau Komuniti Enda Belengka’,” ku iya nerang.

Ba lansa bukai ku Sekam, Polis endang ngelaluka bala komuniti nyereta program Volunteer Smartphone Patrol (VSP) ngambi muntang agi penerang kekaul enggau penyalah dikenatai.

Ku iya, VSP tu inovasyen baru ari raban Polis DiRaja Malaysia (PDRM) ngemuntangka mensia mayuh ngenataika penerang tauka ripot ti begunaka bantu raban polis.

“Kitai mega deka ngatur program Run Against Crime di IPD Meradong kena 5 Oktober tu lalu aku nesau peranak sampal datai ngerichahka program tu,” ku Sekam.

Suara Sarawak