Kaul rayat di Sarawak dijaga

KUCHING: Raban Kristian ba Sarawak sigi enda kala ditagang ngena leka jaku ‘Allah’, pia ku penerang Opis Kepala Menteri, ditu kemari.

Ku penerang nya, Perintah Gempung Parti Sarawak (GPS) deka terus ngetan enggau nyaga pemanah kaul bepengarap ba Sarawak laban nya entara inisiatif nyerakup pupu bansa ba menua tu.

“Perintah GPS mega udah nyaup pengarap bukai nengah penumbuh Unit Pekara Pengarap Bukai (Unifor).

“Kebuah pia laban orang Islam bebasaka orang Kristian sama baka orang Kristian bebasaka orang Islam lalu sama mega enggau sida ari pengarap bukai,” ku penerang nya.

Penerang nya dibantai pengudah Perintah Besai ngapil pasal pemutus Kort Tinggi ngemendarka orang Kristian ngena leka jaku ‘Allah’.

Nambahka nya ku penerang ari Opis Kepala Menteri, sekeda raban ti negika pseudo, ngena frasaologi Tok Nan (ex-Kepala Menteri niang Pehin Sri Adenan Satem) ngaul pekara tu enggau politik maya pengawa bepilih nengeri.

“Taja pia, Ketuai GPS arapka rayat Sarawak enda mudah pechayaka chara ke tau ngasuh sida enda arapka juluk

Perintah Nengeri keran deka nyaga penyerakup pupu bansa enggau pengarap ba Sarawak.

Kenyau ari perintah dipegai Tun Pehin Sri Abdul Taib Mahmud nyentuk dipegai Datuk Patinggi Abang Johari Tun Openg, Perintah GPS seruran ngemeran polisi bebaik entara pengarap ba Sarawak,” ku penerang nya.

Suara Sarawak