PAKAN: Pemanah kaul Datuk Joseph Salang Gandum begulai enggau perintah enggau serikat bekaul perintah (GLC) deka meri empas ke besai ngagai sitak Parlimen Julau.
Salang ti kala nyadi pengari rayat sitak nya sepengelama empat penggal, udah chukup nemu gaya menua enggau pendiau rayat dia.
“Nyadi volunteer enggau peranak asal Julau ngarapka peminta kami ti dekaka Salang nyadi chalun bediri minta pilih ba Pengawa Bepilih Besai Ke-15 (PRU-15) ungkup sitak Julau diberi perati.
“Enti peluang tu diberi ngagai sitak bukai, kelebih Salang diatu nyadi Presiden Parti Rayat Sarawak (PRS), jangka aku sida setuju nunda pengingin kami,” ku Linsu Usat, peranak asal Pakan.
Ku iya, Salang endang bisi kaban belayan ba sitak Julau kelebih agi ba sitak Pakan lalu ari perati raban nembiak, Salang patut dipilih nyadi pengari.
“Aku ngarapka Chairman Gempung Parti Sarawak (GPS) ti mega Premier Sarawak, Datuk Patinggi Tan Sri Abang Johari Tun Openg deka mendingka sada peminta kami,” ku iya madah baru.
Selubang penemu enggau Linsu, Austin Lingoh Sandom ti madahka PRU serak tu chukup besai reti ba sejarah PRS.
“Diatu Salang udah datai baru lalu tu mih berita ti dianti kami rayat Julau pengudah iya belega enda lama nyadi Kaban Parlimen.
“Diatu iya udah nyadi Presiden PRS, parti lumur dua besai dalam GPS ti ngasuh kitai chukup gaga laban juluk ngerampas baru penuduk Julau deka nyadi nyata,” ku Lingoh nampung jaku Linsu.
