SIMUNJAN: Bisi 31 iku angkat sumpah nyadi Kaban Kaunsil Pelilih Simunjan (MDS) ungkup timpuh 2023/2025 di Balai Mesra Simunjan, kemari.
Ari penyampau nya, 16 Kaban Kaunsil endang baru dichiri, 19 ari Parti Pesaka Bumiputera Bersatu (PBB), lima ari Parti Demokratik Progresif (PDP), tiga ari Parti Sa’ati Rayat Sarawak (SUPP) enggau tiga ari Parti Rakyat Sarawak (PRS).
Pengawa angkat sumpah nya dipenyadi Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil.
Sama datai Kaban Parlimen Batang Sadong, Rodiyah Sapiee sereta Adun Simunjan, Awla Dris. Penguang mega meri terima kasih lalu meri basa ngagai bala ex-kaban kaunsil ke udah gawa manah enggau lurus ati nengah MDS suba.
Penguang ke mega Adun Marudi madah ngagai kaban kaunsil pasal pemesai guna nyiri lalu sida beempu tanggungpengawa besai ngagai diri empu enggau komuniti.
“Di Malaysia, kitai bisi tiga atur perintah iya nya Perintah Besai, Perintah Nengeri enggau Perintah Lokal.
“Kita ba renggat baruh endar (Perintah Lokal) ke ngereja pengawa ti beguna amat dikena bejalai polisi, projek enggau program ti udah diberi ngagai kaunsil di selampur Sarawak,” ku iya.
Ku iya, kaban kaunsil ngarika Adun ba renggat baruh ba genap sitak lalu nyadi jematan entara perintah enggau rayat.
“Reti iya, sebarang sebana, isu ti bisi nyadi ba renggat baruh, kita meseti mai iya ngagai pengari rayat enggau Perintah Sarawak.
“Nengah polisi ti udah dilanggur Perintah Sarawak, kita beempu tanggungpengawa ngenataika pekara tu ngagai rayat renggat baruh lalu anang enda ngemerat pengawa kita nyadi kaban kaunsil,” ku iya.
Penguang mega minta raban MDS merambu inisiatif ti besai agi enggau berunding di luar kutak laban mayuh agi meseti diseleti ungkup jemah ila.
“Kerejasama enggau opis bukai, tuai raban bansa enggau mega Kaban Kaunsil dikena ngemanah servis ba MDS kelimpah ngemanah infrastruktur ti bisi di Simunjan tu baka sistem parit, taman rekreasyen enggau ke bukai,” terang iya.
Ba pengawa nya, Seroji Ludin ke mega Pegawai Pelilih Simunjan angkat sumpah nyadi Chairman baru MDS dientudi bala kaban kaunsil bukai. Pengawa nyua setipikit ngagai bala ex-kaban MDS mega bisi diatur.
