SIBU: Kaunter peminta Kenyalang Gold Card (KGC) deka dibuka beserimbai Konvensyen Parti Pesaka Bumiputera Bersatu (PBB) Zon Tengah kena 28 ngagai 29 Oktober tu di Hotel Kingwood.
Pekara tu dipadah Menteri Pemansang Indu, Nembiak Mit enggau Pengintu Pengelantang Komuniti, Datuk Seri Fatimah Abdullah ba aum pemberita pengudah baum Komiti Besai Konvensyen PBB Zon Tengah.
Ku iya, kaunter nya deka disedia Opis Pengintu Pengelantang Komuniti Nengeri Sarawak ari 28 ngagai 29 Oktober tub a ringkat lima hotel nya.
“Tu dikena meri peluang ungkup peminta baru deligit konvensyen ari Zon Tengah enggau mega peminta lama ti apin nerima KGC ngambi nerima kad nya,” ku iya ke mega Tuai Indu PBB.
Fatimah madah, pemisi kaunter nya deka ngemuntang deligit ari menua pesisir ungkup minta ke sebedau tu engka bedau ulih ngambi kad nya.
“Kitai ngasaika mayuh deligit datai, nya kebuah kami deka nyendiaka servis kelebih agi ungkup deligit ari menua pesisir ke enda ulih minta KGC sebedau tu,” terang iya.
Ku ADUN Dalat nya, peminta kelebih agi deligit ti patut minta KGC maya konvensyen nya ila bepeluang bulih kad sida ba hari ti sama.
Ku iya, sida ke udah minta KGC tang bedau bulih kad sida mega ulih betanya pasal nya ngambi dipeda dalam sistem.
Fatimah nyemetak madah, diatu bisi ti udah minta tang apin nerima kad sida ketegal enda ulih ditelefon, lumur telefon enggau adres udah berubah enggau kebuah bukai.
Nangkan nya ku iya, ari 1 Januari 2020 nyentuk 31 Ogos tu tadi, bisi 264,941 kad KGC udah diagih enggau ari penyampau nya, 35,282 kad KGC ti udah diagih nya ari Bagi Menua Sibu.
“Bisi 458 serikat peribit enggau palan komersial udah berejister nyadi bakih strategik KGC ba selampur Sarawak seraya 39 ari penyampau nya bakih strategik KGC ti berejister di Sibu.
“Berebak enggau nya, aku nesau raban perintah, korporat, serikat peribit enggau komersial ari Bagi Menua Sibu nyadi bakih strategik KGC lalu meri pengelantang ngagai rayat Sarawak,” ku iya.
Konvensyen PBB Zon Tengah nya disadang digulu urung 2,500 kaban ari 23 pampang PBB ari wilayah tengah Sarawak.
