Kayu diara atas jalai alun ngicha ulih tengah entukar

PAKAN: Peranak Rumah Tukang, Nyalak Atas ditu ngaga inisiatif kediri beripai ngaraka batang kayu dikena nampal Jalai Sesco, ditu balat rusak awakka ulih ditengah kereban pengangkut nuju rumah panjai sida kena lemai ensana.

Siku peranak asal menua nya, Mathew Berundang,34 madahka jalai alun urung 11 Kilometer pemanjai nya bela ditengah mensia mayuh ari sembilan buah rumah panjai diatu balat lichau, ngeruang sereta banyau laban lutak.

“Manggai 30 taun pengelama kami ditu udah merinsa nujah jalai ke baka tu ninting kali maya musin landas tauka udah ujan bangat. rapka raban bekaul perundingka penusah kami, sapa agi dikeandal kami enti ukai pengari ke udah dipilih ngelama tu.

“Enda patut jalai ba endur bukai ulih diadu menyana tang ba kami ditu lalu mengkang baka nya belama. Kami mega deka ngasaika perengka guna ke menyana baka jalai ba mengeri.

“Enti jalai ditu digaga menyana tentu nyamai kami mindah, ngiga pengidup enggau enda nangi ngundan asil ari kebun ngambika bisi dijual sebelah tamu niniting hari,” ku iya mansutka sebana ngagai Suara Sarawak.

Berebak enggau nya, Mathew mega madah sida di menua nya diatu agi napi penanggul nadai arus internet kelimpah bedau disambung bekal ai beresi.

“Enti enda madahka penusah diri, nyangka orang enda nemu penusah kami. Nya alai, kami ditu chukup randaka pemansang baka ba menua bukai lalu arapka penanggul kami tu ulih diputarka enggau lengkas,” ku tandu Mathew.

MATHEW BERUNDANG

 

INISIATIF KEDIRI…Peranak rumah panjai beripai nusun batang kayu ba jalai alun ke balat luchak.