KUCHING: Gerempung Pemberita Bagi Menua Kuching (KDJA) meri bantu lima mesin oksigen ngagai Sepital Besai Sarawak (HUS).
KDJA dalam siti penerang media madahka, empas ari pengerekai penyakit Covid-19 majak nambah, HUS napi penanggul enda chukup keresa berubat.
Chairman KDJA Ronnie Teo Teck Wei madahka KDJA ngepunka kimpin Derma Pengerindu tengan bulan June lalu udah nerima timbal ti manah ari mensia mayuh.
“Dalam seminggu belanja ti digumpul udah chukup dikena meli sebuah mesin oksigen.
“Mesin oksigen tu dibantu Kelab Mirage Sarawak, Datin Amar Kathryn Wee Yuk Lian, Jong Nyong Moi, Tim Yu Yang 111 enggau Tim Amal Atau (Heart Charity Group),” ku iya.
Ronnie madahka, KDJA amat beterima kasih ngagai raban terabai menua ke nyaga pengerai kelebih agi ba HUS laban udah bebendar gawa dalam ngelaban pengerakai penyakit Covid-19 sereta nentuka semua sistem nyaga pengerai bejalai enggau manah.
“Kami ngarapka bantu keresa berubat ti diberi tu ulih mantu nambahka keresa berubat ba HUS sereta ulih ngurangka tating pengereja pengawa ba palan nya,” ku iya.
Berebak enggau nya Presiden Perintah Besai Gerempung China Sarawak Datuk Richard Wee meri terima kasih ngagai semua penderma ti udah nyukung meri keresa berubat ngagai sepital maya diatu.
“Kami mega bisi meri bantu bekal pemakai ngagai ruang bilik enggau organisasyen ti begunaka bantu.
“Tu pengawa ti manah lalu kami berasai gaga laban udah ngepunka pengawa tu ngagai mayuh gerempung enggau organisasyen orang dagang ungkup mantu sida tu kurang penatai pemisi,” ku iya.
Kelimpah ari lima buah mesin oksigen tu, Kelab Mirage Sarawak mega bisi meri bantu 10 unit ventialator ngagai HUS.
