IPOH: Menteri Komunikasyen enggau Digital, Fahmi Fadzil nerima manah juluk Gerempung Pemberita Bagi Menua Kuching (KDJA) deka Hari Pemberita Nasional (Hawana) ngagai Sarawak taun baru.
Peminta nya disada Presiden KDJA, Ronnie Teo Teck Wei lebuh iya ngabas reruai eksibisyen media Sarawak ba Mini Karnival Hawana 2023, ditu kemari.
“Kami deka berandau enggau komiti pengatur dulu lalu enti nya lanchar, kami deka minta Sarawak ngatur pengawa tu,” terang iya.
Dulu ari nya, Ronnie madah ngagai Fahmi bekaul KDJA ngarap Hawana 2024 ulih diatur di Kuching.
“Kuching bisi pengulih ngatur program tu laban berunding industri aum, insentif, konvensyen enggau eksibisyen (Mice).
“Kami mega andal raban media di Kuching chukup nyukung pengawa negap kaul enggau komuniti media bukai ba selampur menua,” terang iya.
Taun tu keterubah iya media Sarawak ngulu Hawana ti diatur berengkah Hari Enam tu tadi nyentuk pagila.
Kelimpah Mini Karnival, bemacham aktiviti bukai mega diatur baka ‘Treasure Hunt’ ari Kuala Lumpur ngagai Ipoh, pekit boling enggau ke bukai.
Malam kemari, bisi 13 pengari media Sarawak begulai enggau media ari Semenanjung Malaysia sereta Sabah udah makai lemai enggau Sultan Perak, Sultan Nazrin Muizzuddin Shah di Istana Iskandariah, Kuala Kangsar.
Hawana keterubah diatur ba Kuala Lumpur ba taun 2018, ditangkan Melaka taun nyin tadi enggau Perak ba taun tu.
Program nya pelasar ngagai raban media ba selampur menua begumpul lalu berandau isu ti ditapi dalam industri nya.
