KUCHING: Gerempung Pemberita Bagi Menua Kuching (KDJA) sekali agi mantu Sepital Besai Sarawak (HUS) meri mesin ‘patient monitor’ beungkus RM12,500 dalam ngelaban Covid-19.
Bantu tu diberi nengah program Love Donation Drive ke alai pemeri bantu nengah KDJA sekali tu nyengkaum Sarawak Metro Sdn Bhd (Metro Sarawak), Fortune Villa, Cool Mediware Supplies enggau raban media bukai.
Menteri Kaunsil Kandang Menua enggau Pekara Berumah ti mega Penyanding Penemu Komiti Penyangga Penusah Nengeri (JPBN) Datuk Seri Dr Sim Kui Hian madahka pengelurus ati raban ti meri bantu endang manah laban udah ulih mantu orang bukai.
“Ketegal pandemik Covid-19 mayuh pemar ditapi kitai ngasuh kitai bisi enda chukup keresa berubat. Aku meri terima kasih ngagai Sarawak Metro laban udah megai tanggungpengawa dalam ngelaban pengerekai penyakit tu. Tu meh pemanah Sarawak laban semua orang begempung ngaga siti pengawa,” ku iya.
Kui Hian bejaku munyi nya lebuh datai ngemataka pengawa nyuaka chek ari Tuai Pemesai Exsekutif Sarawak Metro Mazli Mustaffa ngagai KDJA ti diarika Presiden KDJA Ronnie Teo Teck Wei.
Dalam bulan June apin lama, KDJA mega bisi meri bantu mesin oksigen ngagai Sepital Besai Sarawak nengah kimpin Love Donation ti diatur Gerempung Perintah Besai China Sarawak (SFCA).
Naka diatu, KDJA udah mujur ngumpul bantu keresa berubat beungkus RM18,000 dikena mantu raban berubat nagang pengerekai penyakit Covid-19 di menua tu.
