Kedai lumur di S’wak dibuka 19 June

KUCHING: Komiti Penyangga Penusah Ngenyit Nengeri Sarawak (JPBNS) kemari ngemendarka operator kedai judi ke bisi lisin ari Opis Menteri Wang bejalaika operasyen sida berengkah 19 June (Hari Lima) tu.

Sapit Kepala Menteri ti mega nyadi Chairman JPBNS Datuk Amar Douglas Uggah Embas madahka pekara nya dikemendar nitihka Standard Atur Pengawa (SOP) ke udah ditetap.

Kemari, kedai lumur selampur nengeri tu apin muka dagang sida taja udah dikemendar bedagang di Semenanjung Malaysia.

Menijar Wilayah Magnum Sarawak, Liew Kee Chuan, madah, 53 pampang kedai nya apin ngepunka dagang laban agi nganti pemendar ari JPBNS.

Ku iya, taja piak sida udah nerima surat ari indu opis di Kuala Lumpur ti ngemendarka sida bedagang, tang sida agi nganti pemutus enggau SOP ari Perintah Sarawak.

Berebak enggau nya, Uggah madahka pasar malam, tamu pagi enggau tamu ujung minggu dikemendar bedagang berengkah ari 20 June tu.

“SOP ungkup pasar malam enggau tamu pagi tu deka dipansutka Opis Menteri Pengawa Berumah enggau Kaunsil Kandang Menua (PBT).

“Sida ke bekaul tau meda SOP pasal pekara tu ba website opis menteri tu,” ku iya.