ARTIKEL

Keingat manah pesan Bujang Berani menua

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

“Diatu, jaga mih menua kitai Malaysia enggau manah, anang ngerembaika penemu ti salah enggau ulih ngeruga pengelantang enggau pengelikun menua.”

Ex-Sarjan Dajai anak Anggie, 86, iya nya siti nama ke enda tentu dikelala kitai laban kurang dikenang bekaul enggau pejalai pengawa iya ti kala enggau raban Bujang Berani ke bukai ngenanka menua rambau menua agi sigau.

Taja pia, anak Iban asal ari Rumah Penurin, Betong tu bisi ngembuan jerita ke ulih ngasuh kitai temegah hati enggau pemerani iya ngelaban munsuh.

‘Bujang Berani’ iya nya gelar ngagai pungka anak lelaki lebih sida ke berani berambunka nyawa betempur ngelaban munsuh ungkup pengelantang bansa enggau menua.

Iya ada kena 15 Ogos 1945 iya nya hari kepenudi tanah Sarawak dipegai perintah Jipun, lebuh nya ukai mudah Anggie anak Assim enggau Timai anak Pungga ngemesaika anak napi pengidup ke suntuk.

AGI BIAK…Dajai anak Anggie

Ungkup penemu, Jipun berengkah merintah menua Sarawak kenyau ari 16 Mei 1942 nyentuk 15 Ogos 1945. Udah nya, kena 12 September 1945 dia Soldadu British berengkah baru merintah Borneo nyengkaum Sarawak.

Pulai baru ngagai kisah Dajai, lebuh umur iya udah chukup endur besekula dia Dajai dianjung apai iya belajar ba sekula St. Augustine, Betong. Maya nya, bala apai indai bela nganjung bala anak sida ke sekula ambika nemu macha enggau nulis aja, lalu Dajai nembuka pelajar iya naka Primari Enam.

Udah badu sekula, Dajai terus gawa ngiga belanja dikena nulung apai enggau indai iya. Maya umur iya manggai 19 taun, Dajai berengkah bisi pengerindu deka masuk pengawa nyadi soldadu, umba maya nya kelai menua benung siga ketegal Konfrontasyen Indonesia-Malaysia.

Dalam taun 1964 tauka maya umur Dajai manggai 20 taun, dia iya mutus ati masuk soldadu. Benasit endar iya mujur dipilih lalu dianjung belatih ba Kem Sungai Petani, Kedah.

Batalion 1 Renjer iya nya alai keterubah Dajai dipadu gawa sepengudah iya tembu belatih. Asil ari latih ke udah diberi, dia semangat enggau pemerani Dajai betambah lalu udah sedia betempur munsuh ke nguji ngeruga pengelikun menua.

Maya jeman Konfrontasyen Indonesia-Malaysia, Dajai siku ari raban Bujang Berani ke dikangau ngambi bagi bejalaika operasyen begulai enggau raban soldadu Komanwel di Batang Ai, Lubok Antu.

Pengangkun enggau penaluk ati ke menua maya nadai banding, berekat ari pengeransing enggau penyulut ngereja pengawa dia Dajai taja baru megai pangkat Lans Koperal udah ditikika pangkat ngagai Koperal.

Pemerani Dajai majak tampak lebuh iya nyereta siti operasyen dalam taun 1971 dikumbai Operasyen Ngayau 3 di Binatang (diatu disebut Bintangor), ba bagi menua Sarikei.

BATALION 1 RENJER

AGI BIAK…Dajai anak Anggie

Maya nya siti unit platun ke digelar Kompeni A ari Batalion 1 Renjer, Kem Pagar Ruyung, Sibu udah diasuh ngagai menua Sungai Garan sepengudah ninga berita oemadu baru ari unit Penyubuk Soldadu madahka sida bisi tetemuka bekau bala komunis ba palan nya.

Betuaika Kapten Welther Wong anak Tedong enggau 16 iku soldadu nyengkaum Dajai bekejang ngena trak soldadu nengah jalai darat Sarikei-Simanggang mansa Sungai Kedup.

Trak soldadu nya semina ngundan bala sida ikas jalai kebun getah ke dikumbai Skim Meradong lalu berengkah ari nya unit platun A ke udah diasuh nitihka komunis bejalai kaki nengah babas kampung jerung enggau begadai sereta chukup bejimat.

Nyau masuk hari keenam sida nyidi bekau bala komunis tang tubuh raban komunis mengkang nadai ditemu sida. Bekal pemakai sida pan nyau majak pungkang ngujungka sida diasuh nikal ngenduh ngagai Pakan, Julau.

Sigi udah gaya maya operasyen soldadu, pengawa keterubah patut diputarka sida, nganjung raban nyubuk palan ke dipelaba bisi munsuh sebedau ngerah bala soldadu bukai nurun.

Jaku kerah ari Seksyen Komander, Sarjan Joseph Mileng Kilong udah milih Koperal Dajai enggau Renjer Unggek anak Anti nyadi soldadu penyubuk.

Sepengudah bejalai umbas iya pengelama, kira pukul lima lemai seduai iya Renjer Unggek datai ba palan ke udah dipadah.

Taja lelak seduai enda muai jam lalu berengkah ngerintis palan nya.Dipandakka jerita, lebuh semua unit platun A datai ba palan ke alai Dajai seduai Unggek, nya baru sida bebagi ka pengawa enggau engkeman agi.
Tanggung pengawa bejaga enggau berapi diatur nitihka gintir. Laban operasyen nya belabuh maya bulan Ramadhan nya alai bala sida makai sama nganti maya bebuka puasa taja dalam platun semina tiga iku aja ke megai pengarap Islam tang sida sama bebasa ke pangan diri.

Pengelelak udah bejalai jauh sereta nyau deka seminggu udah dalam kampung, bala sida bela tumu nindukka diri laban ngenatka diri baru udah makai. Taja pia bisi raban soldadu diasuh bejaga nangika bala komunis datai nyerang belalai.

AGI BIAK…Dajai anak Anggie

DISERANG MUNSUH

Enda mukai-mukai urung pukul 6 pagi semua platun bela tekenyit ninga bunyi utai meletup chukup penginggar ba palan sida ke benung tinduk. Sida bela ensugau angkat nyapai senyata sereta terus ngering diri.

Pemayuh letup senapang enggau munyi peluru ke diselabuka munsuh nuju sida nyau bakaberai aja baka munyi leka ujan.

Sah mih bala sida diserang munsuh belalai, tang sida enda surut diri tetap ngelaban laban sigi udah adat dipegai tiap iku bala soldadu mali nyerah alah sebedau ngelaban.

Maya nya, sida semina betubuh 16 iku aja ari Platun A bebalas timbak ngelaban bala munsuh. Lebuh sida benung betempur, siku ari bala renjer Platun A sempat minta bantu ari indu opis madahka sida benung diserang munsuh.

Tang sayau, bedau abis iya ngeripotka berita nya dia kereban radio ti dikena iya nya rusak kena timbak munsuh lalu ngujungka penusah ditapi sida (Platun A) enda ulih ditemu indu opis endur ti kena serang.

Bala komunis udah nemu sida enda ulih minta bantu agi, nya alai sida majak ngansak lalu minta semua raban Platun A nyerah diri.

Tang Sarjan Joseph Mileng anak Kilong enggau Koperal Dajai udah ngatur sempekat deka malas serang munsuh mua ke malam nya enggau strategi ke lebih manah.

AGI BIAK…Dajai anak Anggie

Kira nyau udah jauh malam, raban Platun A lalu nitih ke sempekat ti udah diterangka Joseph enggau Dajai.

Sida lalu ngerayap ngiga palan ke udah ditetapka enggau begadai seraya ke nganti Koperal Dajai nyerauh nyebut “Agi Idup Agi Ngelaban” , lalu semua sida berengkah betempur baru tang ke sekali tu endang udah sedia.

Lebuh sida ke nyerang munsuh, bom ke ditikau beselang enggau munyi dauh peluru lalu ngujung bala komunis begetar pala patung lalu bisi sekeda berengkah ngelarika diri.

Sarjan Joseph, Koperal Dajai enggau Renjer Unggek majak nguji ngagai munsuh ke dipeda ngelarika diri.

“Semina kami tiga ti berani ngagai bala komunis, enti ngingatka semua nya sigi amat kereja gila, tang laban ba runding maya nadai ngira mati laban semina deka ngalah bedengah munsuh, ” ku Dajai.

Hari siti, urung pukul 7 pagi kena 27 Oktober 1971, baru soldadu bukai enggau penyampau tubuh ke mayuh agi bisi datai ngesah sida Dajai ba sida ke betempur enggau komunis.

AGI IDUP AGI NGELABAN

Sepengudah penatai raban soldadu ke betubuh mayuh nya datai. Sida neruska pengawa nyidi bekau komunis ba kandang kampung nya. Bisi ima iku raban komunis mujur ditemu lalu terus dibunuh kelimpah kedua ti bisi bakal terus ditangkap.

Raban ari Platun A bisi siku lesi iya nya Renjer Nyambong anak Bansa kena timbak munsuh ba pala. Udah nya, tiga iku agi raban sida ke bakal kena timbak iya nya, Renjer Unggek kena timbak ba punggung, Lans Koperal Malang kena timbak ba kaki kiba enggau Renjer Arshad kena timbak ba mua.

Ketegal munyi letup bom kena serang belalai munsuh maya nya mega ngujungka Dajai bisi dua benggal enda berapa lansik ninga.

BUJANG BERANI…Dajai (kiba) begambar kenang enggau Pegawai Waran II, Joseph Mileng enggau Koperal Unggek Anti pengudah tembu Ops Ngayau ke dipansutka ba sebuah surat kabar dalam menua tu.

Bekau ari pemerani maya operasyen Ngayau 3 ny mega, Koperal Dajai, Sarjan Joseph Mileng enggau Renjer Unggek diberi Pingat Gagah Berani (PGB) ari Yang Dipertuan Agung Sultan Abdul Halim Al-Haj kena 23 Disember 1971.

Sepengelama nyau semak 21 taun udah gawa soldadu dia Koperal Dajai pincin lalu pangkat kepenudi dipegai iya nya Sarjan.

Ex-Sarjan Dajai, nirika rumah tangga enggau Lemenkai anak Tamat lalu seduai iya diberi Petara empat iku anak.

Nya alai nyerumba bulan Kebangsaan tu ex-Sarjan Dajai meransang nembiak rebak baru mesti ngembuan ati ke berani enggau ransing ngulihka pengidup ke lebih meruan. Keingatka manah pesan Bujang Berani menua iya nya Agi Idup Agi Ngelaban ba sebarang aja penguji ke nekul pengidup kitai, ku iya.

Taja diatu, menua udah jauh likun tang pengeransing enggau pemerani kitai purih anak Iban enda tau dipunaska ngapa.

“Diatu, jaga mih menua kitai Malaysia enggau manah, anang ngerembaika penemu ti salah enggau ulih ngeruga pengelantang enggau pengelikun menua,” ku iya.

BERITA LAIN

Nempa Sarawak nyadi tibang pemakai

TUSUN KETERUBAH MINAT Reynold anak Jacktola, 29, ti rindu agi dikangau Nol ba pengawa betanam betupi nya endang dikembuan iya ari mit laban iya datai

Tebing Sungai Saratok deka diseleti meruan

SARATOK: Perintah Sarawak deka nyeleti pengkalan ba seberai Pasar Saratok enggau jematan dikena ngelayang Sungai Paon. Kaban Kunsil Nengeri (ADUN) Kalaka, Mohamad Duri madah, sepenyampau

BERITA TERBARU