Kelab Main Asal SDNU Saratok narak rebak ti angkunka main asal

SARATOK: Ulah angkunka main asal patut ditarak ari renggat tumu nentuka pesaka bansa nya enda mudah lenyau ngapa taja diparit seni moden.

Sekretari Kelab Main Asal Gerempung Bansa Dayak Sarawak (SDNU) Saratok, Sita Inka madahka sida naka ulih matak mayuh agi raban bela besaup ngetanka main asal kitai Iban.

Ambika chunto ku iya, baka Ajat enggau Kuntau tu endang identiti kitai Iban laban genap bansa bisi main asal kediri empu ti nyadika pengelebih enggau penyelai bansa sida.

“Ari nya kami ke nyadi komiti dalam gerempung tu chukup temegah ati laban udah dilempaika pengandal ngatur kelas belajar ngajat enggau seni kuntau di menua tu.

“Kitai bela nemu, rebak baru diatu rindu agi ke seni moden tang udah nyadi tanggung pengawa kitai mai sida ngelala enggau angkunka main asal diri.

“Ukai reti kitai nulak seni moden tang kitai patut mai sida tu meretika pemesai guna enggau reti main asal nya ngambi sida enda tepejuh sereta muai identiti diri empu,” ku iya lebuh dirandau Suara Sarawak.

Ke penerang, Kelab Main Asal SDNU Saratok (MAS) tu ditumbuh kena 1 November 2020 lalu betuaika Jeti Kumpai Endawi.

Kelab nya diatu benung ngatur tiga bengkah kelas main asal kitai bansa Iban; Kuntau, Ajat Lelaki enggau Ajat Indu ke diatur ba Rumah SDNU Saratok ninting Hari Enam enggau Hari Minggu.

Ba lansa sama, inisiatif MAS ngangkatka main asal nya mega nerima sukung ari Kaban Parlimen Saratok, Ali Biju empu nengah agih belanja penyampau RM20,000.

Ali ke mega Sapit Menteri Pengeluar Kuasa enggau Pengeraja Asal madahka sebarang pengawa ngaul main asal endang patut disukung.

Berita penuh Ruai 5 pagila.

SENI NGETANKA DIRI… Tebal agi sida ke masuk kelas belajar kuntau datai ari rebak biak.

Suara Sarawak