Kelab Rekreasyen Taman Pandan Jaya temegah kaul seati majak teguh

KUCHING: Kelab Rekreasyen Taman Pandan Jaya mujur ngatur Pengerami Makai Taun Kelima seraya Ngiga Belanja kena Hari Enam tu tadi.

Chairman sida, PW (B) Lenggang Nuing madahka diri berasai lantang endar ati meda pemujur sida sebuat ngatur pengerami sekali tu.

Ku Lenggang, pemanah kaul kerejasama entara sida nentuka pemujur pejalai pengerami malam nya lalu iya chukup temegah ati.

“Pengawa enda deka mujur enti nadai kerejasama rat enggau saup ari semua kaban kelab kelimpah sepenemu ngereja pengawa.

“Pia mega sukung tegut ari semua bala ke bisi datai nyukung pengawa kami nadai ngira ari kaban kelab, gempung ukai dikuasa perintah (NGO) sereta orang ngatika diri.

MAI SERAKUP… PW (B) Lenggang Nuing

“Nya alai aku ngena peluang tu meri terima kasih ke pemanah budi semua kita ti semampai meri sukung ngagai kami kenyau ari kelab tu ditumbuh lima taun ke udah,” ku iya.

Lenggang mansutka jaku tu ba mua mayuh malam pengerami nyadi lebuh meri jaku pengelalu ngarika kelab sida.

Nangkan nya, iya mega meri besai terima kasih ngagai Kaban Kunsil Nengeri (Adun) Tamin, Ir Christopher Gira Sambang diarika Sekretari Politik Kepala Menteri Sarawak, Edwin Banta, ti udah ngelimpangka awak diri ngulu pengawa sida.

“Malam tu baka diajih, kitai nerima penatai bala temuai dipebasa ti ukai orang bukai, endang diri sebala pengudah sida betusut enggau pangan diri tadi.

“Nya kebuah aku ukai semina lantang ati meda bala mayuh begelumu malam tu tang mega berasai gaga endar laban nengah pengerami baka tu mujur nanggam kaul diri sebala ti jarang betemu.

NGETAN MAIN ASAL… Tanda Ajat dikena masa penatai bala temuai.

“Simpul kaul enggau diri sebala ti udah lama renggang tau dikedutka baru kelimpah nempa kaul enggau bala bukai ti baru dikelala,” tandu iya.

Iya nyemetak madahka tu mega deka nyadi teladan ngagai rebak baru ngemeranka pemanah kaul enggau pemereti ati lebuh begulai enggau pangan diri.

Macham rintai program ngerichahka atur pengerami malam nya kelimpah bala temuai disambut bala komiti pengatur ngena adat basa, ai basu kaki, ba pintu penama.

“Endang baka selama, ai basu kaki tu kelai basa dikena kitai ngelalu penatai bala temuai lalu enti di rumah panjai macham bungah kitai nikika bala pengabang.

“Bungah kitai diau di mengeri engka bebida tang tuju tetap sama, kelai basa enggau penyiru kitai ke pangan diri,” tandu iya.

BEJADI… Pengawa melah kek bebala mayuh kelai serakup nyapai pemujur.

Nambah nya ku Lenggang, sida enda ngelaungka pemansang pelajar bala anak kaban kelab sereta besaup mantu pangan diri ti dituntung penusah tauka penanggul bukai.

Nya alai sida ninting taun deka nyendiaka pemeri insentif nyadika peransang nyapai penyulut ba pelajar.

“Pelajar tu beguna amat, nadai ngira sida ke nembiak enggau besai tuai, laban tu kereban dikena kitai berimba jeman diatu.

“Enti kelia, duku enggau pengering tulang dianjung kitai ngiga pengeraja tang diatu dunya udah jauh berubah, pelajar nyadika duku penebas berimbaka penemu ngulihka pengidup.

“Nya kebuah kami ngarapka pemeri insentif pelajar tu ulih ngasuh bala anak ransing agi ngiri penemu enggau pengelandik dikena beridup,” ku iya meransang.

Pengerami lemai nya mega richah enggau main asal baka ajat ngelalu pengabang, tanda moden ngena lagu Senorita’ enggau tanda bebala mayuh ungkup pemerindang.

Entara rintai program bukai bisi diatur baka lagu dipelanja, Suara Emas, chabut tikit benasit enggau chabut tikit mija benasit, melah kek, nyua insentif enggau pemeri ngagai bala kaban kelab.

Sama datai Presiden Serakup Dayak Iban Sarawak (Sadia) Pampang Kuching, Datuk Paduka Dr Anthony Nait Mani, Menijar Kanan Brooke Dockyard And Engineering Works Corporation, Lubau Genam sereta lebih 700 temuai bukai.

BUNGAH… Edwin dibatak ngajat ba atas panggau

Suara Sarawak