PENGERAMI Hari Easter tauka Hari Paska asai bisi timpang enti nadai pengawa nyadung telu ngagai raban Kristian ke ngintu hari besai nya.
Telu endang kelai tauka simbol pengada baru tanah maya musin bungai sereta kelai pengangkat Tuhan Jesus ba semua Kristian.
Ari nya, beratus igi telu udah diagih ngagai raban ke bisi besembiang Misa nyerumba hari besai nya ke diatur ba Gerija Anglikan St Thomas, ditu kemari.
Telu nya diias ngena bemacham ukir udah narit ati mensia mayuh ti datai besembiang ngena mayuh chura.
BEMACHAM CHURA
Pengawa ngagih telu nya dikereja pengudah pengawa merekat telu ti diberi bala kaban gerija.
Pengawa merekat telu nya dipenyadi paderi Gerija Anglikan St Thomas, Revd Ralpheal Reuben.
Kelimpah pengawa ngagih telu, tanda rebana (pengawa puji sembah) ari bala kaban gerija mega dibantai kemari.
Pengerami Paska suah agi diintu entara March ngagai ujung April ninting taun ungkup semua orang Kristian nitih ke pusin bulan.
HARI BESAI
Sebedau pengerami Paska, Minggu Kudus bisi diintu, lalu Hari Lima sebedau Paska endang Hari Lima Kudus iya nya hari ngingat Tuhan Jesus udah diregang.
Sebedau nya, Hari Minggu Daun Dan diintu kena 2 April kelai Minggu Kudus belabuh lalu tiap iku raban Kristian diberi daun dan ti udah diberekat paderi.
