Penyakit riman tusu mengkang nyadi pemunuh lumur satu ditapi raban orang indu di Malaysia, nyengkaum di nengeri kitai Sarawak.

Pia mega penyakit dirintaika nyadi penyakit kedua tinggi ke ulih nabanka nyawa mensia ba dunya.

Nitihka penerang dipansutka Pansik Riman Malaysia ari taun 2008-2018, penyampau orang ti udah bebadi nyawa ketegal penyakit tu nyau manggai 9.6 juta ba dunya lalu ari penyampau nya bisi 16,000 peranak menua Malaysia.

Penyampau tauka pemayuh ti udah bebadi nyawa tu balat bendar ngirauka ati.

Suara Sarawak bisi ngerandau siku ex-Misi ke mega nyadi pengelicha dibaruh Pemungkal Know Your Lemon, Cecilia Siti Una.

Cecilia madahka penyakit tu enda ngira umur tang tebal agi orang indu ke napi penyakit riman tusu beumur entara 41 ngagai 55 taun, lalu ditangkan sida ke beumur entara 56 ngagai 70 taun, 26 ngagai 40 taun dah nya lebih ari 70 taun enggau baruh ari 26 taun.

“Dikena nyeliahka sereta ngurangka penyampau orang kena penyakit riman raban orang indu diperansang beperesa tumu ngambika tumu ditemu awakka penyakit nya ulih diperubat,” ku iya.

Dibaruh Pemungkal Know Your Lemon, Cecilia mayuh meri penerang ngagai orang indu kelebih agi sida ti diau ba menua pesisir, palan pelajar tinggi enggau sekula awakka ngelala kelai tumu riman tusu.

Ku iya “mammogram siti ari chara ulih nemu igi penyakit riman tusu ke bedau ulih diasaika.”

Iya madahka bisi 12 kelai riman tusu ti mesti ditemu orang indu iya nya kulit tusu bisi berupai tebal, mulut tusu bisi tengelam mimit, mulut tusu bisi bekerak, tusu berasai angat sereta mirah, bisi ai nitik tang ukai ai tusu, kulit tusu bisi berasai pedis, bisi bawai ba tusu, urat tusu nyau bisi ayan, pemesai tusu enda sebaka, kulit tusu nyau baka churak limau mansau, tusu bisi berupai tengelam lalu ke penudi bisi berigi kering diasaika ba tusu.

“Kitai empu mesti nemu gaya pendiau tusu ti nadai penyakit ambika nyamai kitai nemu enti bisi penyelai sebedau deka ngaga peresa mammogram.

“Tang nyema meh bisi berigi, ukai mega reti bisi ngembuan igi penyakit riman tusu,” ku Cecilia.

Sebedau nutup randau, iya sempat madahka chara meresa tusu kadiri empu ba rumah iyanya bediri ba mua cermin lalu lengan sepiak diangkatka, udahnya ngena jari sepiak agi nekanka tusu, enti nyema bisi asai berigi anang malu bai betemu ngau lutur tang enti nyema nadai nenama tau ngaga peresa mammogram.

Beserimbai enggau bulan riman tusu tu Pemungkal Know Your Lemon bisi udah nyadung pikit pemakai enggau sekeda keresa orang indu sekali enggau buah lemon dikena meri tanda serta meri penyedarka orang indu senentang igi penyakit riman tusu.