KUCHING: Kelas Leka Main Asal belajarka Pantun Iban enggau Beganu udah mujur diatur Akademi Serakup Dayak Iban Sarawak (Asadia) nengah chara online.
Ketuai Asadia, Mabong Unggang madah timbal ari mensia mayuh chukup ngemantup ati iya nya bisi 20 iku datai ngambi bagi mungkur raban besai tuai enggau nembiak rebak baru.
“Kelas Pantun enggau Beganu tu tu diajar pengajar Len anak Asit iya nya siku orang ke endang mayuh peneleba ba leka main asal.
“Tuju Asadia ngatur kelas tu dikena ngerembaika leka main asal Pantun Iban enggau Beganu.
“Pia mega, kelas serak tu diatur kami nengah chara online beduduk ari nyeliahka raban ke ngambi bagi ba kelas tu betemu mua enggau nagang pengerekai Covid-19,” ku iya madah ngagai Ruai, Suara Sarawak, ensana.
Berebak enggau nya, pengajar Lin ngarapka meransang nembiak rebak baru patut angkun sereta rindu belajarka main asal diri.
Ba penemu siku penyereta kelas tu, Dr Dana Badang madahka kelas tu manah amat dikena ngangkatka leka main asal Iban baka Pantun enggau Beganu.
“Enti ngelama tu semina ninga orang bepantun, tang serak tu diri empu enggau masuk kelas Pantu enggau Beganu diatur Asadia, dia aku majak mereti agi chara bepantun tauka beganu ke nyengkalan,” ku iya seraya muji inisiatif Asadia laban kelas online nya ulih dipasuk enda ngira umur enggau ulih ba dedini endur penyereta diau.
Udah nya, ba penemu Nichol Ragan Lang, 85, raban nembiak rebak baru patut amat nguna peluang masuk kelas ke baka tu laban genap leka main asal kitai Iban endang ngembuan tuju dikena ngenang adat enggau daya idup kitai bansa.
Kenu terang Mabong, dua iku penyereta pemadu biak dalam kelas tu iya nya Vanessa anak Robincess,15, ari Kpg Junggu Mawang, Balai Ringgin enggau Fexia Greection,15, ari Kuching.
Ungkup penemu, Kelas Leka Main Asal tu berengkah 6 Oktober tu tadi lalu deka terus dipejalaika ninting Hari Tiga pukul 8.00 malam.
