KUCHING: Akademi Serakup Dayak Iban Sarawak (Asadia) deka berengkah muka Kelas Main Asal baru belabuh bulan Ogos tu ila bepalan ba Opis Sadia, Kota Sentosa.
Tuai Asadia, Mabong Unggang madah Kelas Main Asal tu mungkur Kelas Ngajat Indu enggau Ajat Lelaki, Kuntau, Betabuh,Gendang Pampat enggau Ngaga Tangu tauka Nusuk Marik.
Nya alai, barang sapa ti deka masuk kelas tu tau betelefon terus nuju Mabong ba lumur telefon 0126925562 tauka nuju Henry Guya ba lumur 0198884370.
Kelimpah ari nya, enti deka nemu penerang ke lebih silik ulih ngenataika diri ngagai Opis Sadia di Kota Sentosa maya pukul 6 lemai kena 31 Julai tu ila.
Ngelansa pekara bekaul Mabong madah jam ke diatu sida benung nembuka Kelas Ngajat raban ke masuk taun 2020 suba. Sida tu raban ke tejanggal belajar sekumbang Atur Mindah Betagang (PKP) sebedau tu.
Semua kelas tu tu, ku iya disadang tembu ujung bulan tu. Bisi 25 iku semua sida ti masuk kelas belajar ngajat sebedau tu tang ketegal PKP ngujungka penyampau nya majak kusut tinggal 11 iku.
Ungkup penemu, Kelas Ngajat nya diatur ninting Hari Satu enggau Hari Tiga berengkah pukul 7.30 malam nyentuk pukul 9.30 malam sereta diajar Pengajar Sia anak Limping (Ngajat Indu) sereta Pengajar Ericson (Ngajat Lelaki).
Kelimpah ari nya, di Siburan kelas ngajat tu mega agi bisi diatur sereta diajar Pengajar Sharia Xania.
