KUALA LUMPUR: Enda manggai satu peratus pekebun tauka penupi jelu bedandang besar ba menua tu bejalaika pengawa betanam betupi organik.

Menteri Pengawa Betanam Betupi enggau Jamin Pemakai, Datuk Seri Mohamad Sabu madah, ketegal nya, opis menteri iya bekerejasama enggau raban peribit sereta gerempung ukai dikuasa perintah (NGO).

Ku iya, sida chakah bejalaika inisiatif ngelakuka pengawa betanam betupi organik ngagai raban pemekuh industri nya ba menua tu.

“Diatu kitai ngemeratka dua pugu. Pugu keterubah ngerembaika pengawa ngelakuka ba renggat dalam menua ungkup produk premium nyelai.

“Tu nyengkaum asil organik enggau pemakai bepengerai dikena nyukung pengawa ngeluarka produk tu ba makit.

“Pugu kedua iya nya nambah ke guna pengawa meri setipikit standard pemakai ngagai pemansut pemakai nyengkaum myGAP (Malaysian Good Agricultural Practices) sereta myOrganic lalu genap perengka organik tu patut bulih pemendar ari kededua kaunsil tu,” ku iya.

Mohamad Sabu nibar jaku nya dikena nyaut tanya ari Senator Susan Chemerai Anding ti minta opis menteri nya mantaika chara sida ngelakuka pengawa betanam betupi organik ba menua tu, kemari.

Iya madah, myGAP ngembuan pangku pengawa meri pemendar ngagai sebengkah produk ti bedau diaku enggau dijual nyadi produk organik.

“Pemendar ari myGAP tu sebengkah pekara tang ba renggat opis menteri, kitai deka matau barang ba makit lalu mensia mayuh ulih mai ngagai kitai ngambi diperesa sekali ke produk tu amat organik tauka ukai.

“Laban munyi ku padah aku tadi, kurang ari satu peratus pengawa betanam betupi organik ba menua tu tang ba makit, mayuh orang ngumbai tu produk organik,” ku iya.

Iya nibar jaku nya dikena nyaut tanya tambah ari Senator Datuk Dr Dominic Lau Hoe Chai ti deka nemu chara dikena penguna ngelala pengamat sebengkah produk organik ba makit. -BERNAMA