TATAU: Peranak ti bisi tanah puang dilalau ngereja enggau ngemansang tanah sida lalu enda ngelak ke iya pia aja.

Ku Menteri ba Opis Premier Sarawak, Datuk John Sikie Tayai, rayat ti bisi tanah diperansang ngereja tauka ngemansang tanah sida enggau pengawa betanam betupi ngena chara moden agi laban chara lama enda ngenataika asil ti besai.

Ku iya agi, tanah nya meseti disukat dulu ngambi tanah nya ngembuan rega ti ulih dikemansang.

“Tanah ti udah disukat deka ngemuntang pengawa kita ngemansang tanah nya sekali ke ngena chara ‘joint venture’, disuwa tauka kita empu ngereja tanah nya ngena bemacham chara ti bisi.

“Nya kebuah aku nyemetak madah tanah tu meseti disukat laban nya ulih meri rega ngagai tanah nya ngambi ulih dikemansang, baru ulih meri asil ngagai semua kita,” ku iya.

Sikie nyebut pekara nya lebuh bejaku ba Program Abas UKAS Sarawak Maju Makmur Bagi Menua Bintulu di Rumah Tandang Tatau, empai lama.

Ku Sikie agi, bisi bemacham chara ti ulih dikena ngereja kediri tanah ti bisi baka ngasilka produk ngena chara komersial enggau dagang.

Ku iya agi, peranak rumah panjai patut nanam utai tanam ngena chara komersial ti ngenataika pemisi lalu ukai semina betanam ungkup bala diri sebilik aja tang mega nanam produk ti tau dijual.

Berebak enggau nya, ku Sikie, Kakus disadang seruran mansang ba baruh Ejensi Pemansang RASCOM (RASDA) enggau Bintulu Rural Deveploment Task Force.

Iya madah, Kakus aja pelilih ti bisi ba baruh kededua ejensi nya lalu tiap iti ejensi nya bisi bajet RM1.5 bilion.

“Nengah kededua ejensi nya ti ulih ngangkat pemansang ba pelilih tu, Kakus deka mansang ba timpuh lima taun deka datai enggau pemansang ti dijapai ukai semina ba penatai pemisi ekonomi ti nambah tang mega ba infrastruktur, jalai alun enggau ai,” ku iya.