Kemari 191 kes positif baru, siti kes pemati

KUCHING: Sarawak ngerikodka siti agi kes pemati baru di Pelilih Menua Song kemari.
Komiti Penyangga Penusah Ngenyit Nengeri (JPBN) dalam siti penerang media kemari madahka, nya ngujungka kes pemati di Sarawak nambah 37 kes.
Nangkan nya, bisi 191 kes positif baru Covid-19 dirikodka kemari ba Pelilih Menua Sibu bisi 81 kes, Kanowit (38), Bintulu (16), Matu (12), Song (8), Kapit (7), Sarikei (5), Samarahan (5), Miri (4), Bukit Mabong (4), Kuching (2), Beluru (2), Dalat (2), Bau (1), Daro (1), Belaga (1), Selangau (1) enggau Meradong (1).
Tu ngujungka penyampau kes positif Covid-19 di menua tu bisi 4,315 kes.
Ngelansa kes pemati ti ke-37, iya siku indu rayat menua ke beumur 41 taun.
Kes diperubat ba Sepital Kapit kena 23 Januari ketegal sendat seput.
Peresa rT-PCR kes lebuh ba Sepital Kapit madahka iya positif Covid-19.
Taja pia, kes tu siku orang nyelai pendiau (OKU) sereta ngembuan penyakit bukai baka darah tinggi, penyakit ampus enggau obesiti.

Suara Sarawak